Нәзік жандылардың төл мерекесі 8 Наурыз — Халықаралық әйелдер күні қарсаңында «Нұр Отан» партиясы Семей қалалық филиалының атынан Бірыңғай зейнетақы жинақтау қорының Семей қалалық филиалы директоры, қалалық мәслихат депутаты Дариға Дайырова, №2 аралас үлгідегі емхананың бас дәрігері Гүлнар Шарипова және «Нұр Отан» партиясы Семей қалалық филиалының ұйымдастыру бөлімінің меңгерушісі Гүлнар Игентаева кеше «Алтын алқа» иегерлері, ҰОС ардагерлері, қарт аналарды құттықтап, шаңырақтарына бас сұқты.
Партия өкілдері он балаға әлемнің жарығын сыйлаған әз ана Жаңылхан Мақұлбекованы бірінші болып құттықтады. Бүгінде сексен үш жасқа аяқ басқан Жаңылхан апа — балаларынан 15 немере, 5 шөбере сүйіп отырған бақытты әже. Ажарына әжім түскені болмаса, қарияның қимылы ширақ, әлі тың. Өзіне көрсетілген сый-құрметке риясыз ризашылығын білдіріп: «Барлық әйел-аналарымызды, қыздарымызды мерекелерімен құттықтаймын. Ұзақ ғұмыр, баянды бақыт тілеймін. Осындай құрмет көрсетіп жатқаны үшін «Нұр Отан» партиясына, қала әкімі Айбек Мүталапханұлына алғысымды айтамын. Ел іргесі тыныш болып, мерекеміз берекелі болсын,- деген ақ жаулықты әже дастархан басында құттықтап келген меймандарға ақ батасын да берді. Әжейге камзол кигізіп, ұзақ ғұмыр тілеген Дариға Дайырова:
— «Қариясы бар үйдің қазынасы бар» деген дана халқымыз. Ұрпақтарына тәрбие беріп, салт-санамызды дәріптеп отырған сіздердей қарияларымыз, батыр аналарымыз аман болсын, — деген тілегін жеткізді.
Жаңылхан әженің ақ батасынан кейін құттықтаушылар ҰОС ардагері, «Қызыл жұлдыз», «Отан соғысы» 2 дәрежелі ордендері мен 30-ға жуық медальдардың иегері, 89 жасар Анастасия Трясунованың үйіне келді. Көрсетілген құрметке алғыс білдірген ардагер ананың да айтары көп екен. Сұрапыл соғыс жылдарында от пен оқтың ортасында жауынгерлер жанына араша түсіп, мейірбике қызметін атқарған Анастасия әжей соғыс аяқталып, жеңіспен елге оралған соң да еңбектен қол үзбей, құрметті демалысқа шыққанша ақ халатына кір шалдырмай ісін абыроймен атқарған. Отасқан жарымен 50 жыл баянды ғұмыр кешіп, қос құлындарын қатарынан қалдырмай, білім мен тәрбие берген. Темірдей тәртіп пен адалдықты сүйген ананың ықпалы болар, ұлы әскери саланы таңдаса, қызы ана жолын қуып, ақ халатты абзал жандар қатарына қосылған. 6 немересі мен балалары Ресей, Польша, Украинада тұрады екен. Әжей жалғыз болса да, балаларының қолына бармай отырған көрінеді. Себебі, Семей қаласын ешқай қалаға айырбастамаймын дегенді айтады.
{jcomments on}Анасына алаңдайтын балалар күн сайын қоңырау шалып, халін білсе, Жеңіс күнінде батыр аналарын құттықтап келіп тұратын көрінеді. Анастасия әжей осы жасқа келсе де қала тынысынан хабардар, жаңалықты қалт жібермейтін жан. Өз кезегінде әжей «Нұр Отан» партиясының 15 жылдығымен құттықтап, бейбіт ғұмыр кешіп жатқан Қазақстанда тұрып жатқандығына шүкіршілік етеді.
Сонымен қатар, құттықтаушы топ ҰОС ардагері, 95 жастағы Мария Писаренконың да шаңырағына барып, құттықтап, мерекелік сыйларын табыстады. Жалындаған жастық шағында Мария әжей ұрыс даласында байланысшы болып, жауынгерлерге сүйінші хабар жеткізген. Соғыс аяқталған соң елге келіп, еңбек еткен. Отбасын құрып, осы жерде ұрпақ сүйген. Бүгінгі күні қызынан екі жиен сүйіп, сүйініш етіп отырған жайы бар. Құттықтап келген «Нұр Отан» партиясының мүшелеріне ризашылығын білдірді. Қызының айтуынша, соңғы 6 ай бұл отбасы үшін тосын сыйға толы бол-ған. Өткен жылдың соңғы күндері облыс әкімі Бердібек Сапарбаев пен қала әкімі Айбек Кәрімов «Энергетик» ықшамауданынан бір бөлмелі пәтердің кілтін табыстапты.
Осылайша, «Нұр Отан» партиясының мүшелері көктемнің шырайлы мерекесінде қарт аналардың жүзіне күлкі, көңілдеріне қуаныш сыйлап қайтты.
Әйгерім СӘРСЕНҒАЛИ,
«Семей таңы»
