Абайдың мемлекеттік тарихи-мәдени және әдеби-мемориалдық қорық-мұражайында Абай атындағы қазақ музыкалы — драма театрына 80 жыл толуына орай, аталмыш өнер ордасының шығармашылық ұжымымен кездесу кеші өтті.
Кешке, қалалық мәдениет және тілдерді дамыту бөлімінің өкілдері, шаһардағы бірқатар мәдениет ошақтарының басшылары мен қызметкерлері, М.Төлебаев атындағы музыкалық колледж сияқты өнер саласында мамандар даярлайтын оқу орындарының оқытушылары мен студенттері және БАҚ өкілдері қатысты.
Халық арасында «ата» театр атанып жүрген қара шаңырақтың биыл күзде сексен жылдығы атап өтіледі деп күтілуде. Абай атындағы театр – қай кезде де қазақтың рухани биігі болған қастерлі мәдениет ошағы әрі тарихы тереңде жатқан, өзіндік дәстүрі қалыптасып, талай тарланды түлеткен еліміздегі бірегей өнер ордаларының бірі деуге болады. Кеште алғашқы болып сөз алған Абай мұражайының директоры, филология ғылымдарының докторы, доцент Жандос Әубәкір Абай театрының 80 жылдық мерейтойымен құттықтап, аталмыш өнер ұжымына мұражай атынан естелік сыйлығын табыс етті.
Одан кейін сөз алып, мәдениет саласы мамандарының басын қосып, осынау кешті ұйымдастырып отырғаны үшін мұражай ұжымына шексіз ризашылығын білдірген Абай театрының көркемдік жетекшісі әрі режиссері Е.Жуасбек қаладағы аттас мекемелер, яғни, Абай атындағы театр мен мұражай және кітапхананың мақсаты бір екенін, ол қазақтың өнерін және Абайдың шығармашылығын насихаттау екенін айта келе, Абайдың қара сөздерінен мысал да келтіріп өтті. Кезегі келгенде сөз ал-ған «Еураз-шоу» театрының директоры Ғибрат Азубаев та Абай атындағы театрдың мерейтойын өткізуге өзі басқарып отырған өнер ұжымы барынша атсалысатынын жеткізді. Ал, Қазақстан Республикасының халық әртісі Бекен Имаханов театр тарихынан сыр шертті.
{jcomments on}- Мен театрға 1959 жылы келген едім. Ұлы отан соғысынан кейінгі кезеңдерде қиыншылыққа қарамай, сол кездегі театрдың ауыр жүгін арқалаған Сіләмбек Қыдыралин, Жұмаш Сәкенова сынды аға-апаларымыз театрды біздерге, кейінгі толқынға аманат етіп қалдырған еді, — деп басқа да өнердегі ұстаздары туралы естелік әңгімелер өрбітті.
Абай театрының тарихы 80 жылдан да ары екенін айтқан Бекен Имаханов 1920 жылдары құрамында әйгілі Ә.Қашаубаев, И.Байзақов, Ж.Шанин, Қ. Қуанышбаев сынды майталман өнер иелері топтасқан «Ес-Аймақ» театры Кеңес Үкіметінің бұйрығымен 1934 жылы ғана ресми түрде бекітілгенін, әйтпесе, 1917 жылы заңғар жазушы Мұхтар Әуезовтің басшылығымен «Ойқұдық» жайлауында қойылған «Еңлік – Кебек» пьесасы қазақ еліндегі жаңа өнердің тұсаукесері болғанын айтты. Сөз соңында Б.Имаханов бүгінгі жастарға жар-қын болашақ тіледі.
Ал, кезегі келгенде сөз алған Абай театры әдеби бөлімінің меңгерушісі Олжас Соғымбай алдағы қыркүйек айында өтетін мерейтойдың іс-шараларымен таныстырып өтіп:
— 80 жылдық мерейтой тек қана Абай театрының арқасындағы жүк емес. Абайдың ізі қалған, Мұхтардың қолының табы қалған, Шәкәрімнің шамы қалған Семей топырағына, Семей театрынының мерейтойына Алаштың төрт қанатынан қонақтар көптеп келгенде бір жағадан бас, бір жеңнен қол шығарып, жұдырық болып жұмылып, мерейтойды бірлесіп өткерсек,- деген ұсынысын да білдірді.
Театр мерейтойына арналған алғашқы шараны ұйымдастырып отырған Абай мұражайына, жалпы, өнер жанашырларына Абай театрының әкімшілігі мен әртістерінің атынан алғысын айтқан Олжас Соғымбай:
— Абай туралы оқығысы келген адам алдымен Абай кітапханасына барып, білімнің бастау бұлағынан нәр алады. Оқығанын көзімен көргісі келсе, Абай мұражайына келіп, көзімен көріп куә болады. Егер оған да шөлі қанбаса, Абай театрының табалдырығынан аттап, қойылымдарды тамашалайды. Міне, осындай өсиетті де қасиетті жерге табанымыз тиіп жүрген біз өте бақытты ұрпақпыз, — дей келе, — Абайға барсаң, Шығысқа барсаң, теңіздей тулап тасасың, Жидебайға барсаң, тарихты танып, мауқыңды содан басасың. Бөріліге барсаң, алты қырлардан асасың. Бәрін айтқын да бірін айт, Абайдың елі, Абайдың жері жасасын! – деп қорытты сөзін.
Кеш барысында театр әртістері «Еңлік – Кебек» қойылымынан үзінді қойды. Өнерпаз жастар ән шырқап, кештің шырайын кіргізді. Театр тарихы туралы ақпараттар да айтылды. Жиналған қауым арқылы мұражай ұжымы әзірлеген слайд жұмыстарын да тамашалап отырды. Кеш соңында студент жастар театрға қатысты өнер адамдарына сұрақтарын қойды.
Нұрдәулет КӘКІШЕВ, «Семей таңы»
