21 ақпан күні Шәкәрім атындағы мемлекеттік университеттің акт залында ҚР Тұңғыш Президенті – Елбасы қорының «Әлеуметтік идеялар жәрмеңкесі-2019» жобасы жеңімпаздарын марапаттау кеші өтті. Шараға ҚР Тұңғыш Президенті — Елбасы қорының аға үйлестірушісі Гүлнар Ершіманова, ШҚО Қазақстан халқы Ассамблеясы хатшылығының басшысы Ж.Асқарова, Семей қаласы әкімінің орынбасары А.Садырбаев, жобаның серіктестері мен сарапшылар және этномәдени орталықтардың өкілдері қатысты.
Татар қоғамдық орталығының «Бақытты отбасы – берекелі отбасы» жобасы ҚР Тұңғыш Президенті – Елбасы қорының «Әлеуметтік идеялар жәрмеңкесі-2019» байқауының жеңімпазы атанып, грант ұтып алған болатын. Татар қоғамдық орталығының жетекшісі Камилия Исмаилованың жетекшілігімен отбасылық құндылықтарды насихаттау мақсатындағы жоба аясында психологиялық тренингтер мен жас ата-аналарға арналған коучингтер, этномәдени орталықтардың қатысуымен «Үздік келін» байқауы, отбасылық шығармашылық ұжымдар фестивалі, спорттық сайыстар, «Менің отбасым» бейнероликтер байқауы, «Жар-жар» неке қию сарайында жас жұбайларға арналған акциялар және тағы басқа бірқатар маңызды шаралар ұйымдастырылды.
— Ең алдымен ҚР Тұңғыш Президенті – Елбасы қорына «Бақытты отбасы – берекелі отбасы» атты әлеуметтік маңызы бар жобаны жүзеге асыруға мүмкіндік бергені үшін алғыс айтқым келеді. Өткен жылдың басында жастармен кездесуінде Елбасы отбасы құндылықтарын сақтаудың маңыздылығын баса атап өткен болатын. Өкінішке орай, Қазақстанда ерлі-зайыптылардың ажырасуы белең алып отыр. Татар қоғамдық орталығының жетекшісі, «Nur Otan» партиясы филиалының саяси кеңесі мүшесі ретінде бұл мәселе мені де алаңдатты. Жобаны жүзеге асыруға біз де өз үлесімізді қостық, — дейді Татар қоғамдық орталығының жетекшісі Камилия Исмаилова.
ҚР Тұңғыш Президенті — Елбасы қорының аға үйлестірушісі Гүлнар Ершіманова да «Бақытты отбасы – берекелі отбасы» жобасына оң бағасын берді.
— Елбасы қоры шығармашыл жастар мен жас ғалымдардың ғылым және техника саласындағы жетістіктерін қолдап, әлеуметтік маңызы бар түрлі жобаларды жүзеге асыруға мүмкіндік беріп келеді. «Әлеуметтік идеялар жәрмеңкесі-2019» байқауы – азаматтық институттарды қолдауға және дамытуға арналған қордың ең ауқымды жобаларының бірі. Осы сәтті пайдалана отырып Шығыс Қазақстан облысының Татар қоғамдық орталығын 30 жылдық мерейтойымен құттықтағым келеді. Әлеуметтік маңызы бар жобаларды сәтті жүзеге асырып, әрі қарай да табысты қызмет ете беріңіздер,- деді Г.Ершіманова.
ШҚО Қазақстан халқы Ассамблеясы хатшылығының басшысы Ж.Асқарова, Семей қаласы әкімінің орынбасары А.Садырбаев құттықтау сөз сөйлеп, орталық жетекшісі Камилия Исмаиловаға алғыс хаттар табыстады.
Жадыра ТӨЛЕГЕНҚЫЗЫ, «Семей таңы»{jcomments off}
