Қалада су тасқынының алдын алуға дайындық шаралары бастау алып, қолда бар барлық күш жұмылдырылуда. Көктемнің келуіне бір аптадай уақыт қалды, қар еріп, су басу қаупі де жоқ емес. Әсіресе шет аймақтар мен жекеменшік үйлерді су басу қаупі жоғары. Осы орайда су тасқынына қарсы іс-шаралар жоспары жасалып, қала көшелері мен аудандарына мониторинг жүргізілуде, жеке сектор қардан тазартылуда, арық жүйесін тазарту жұмыстары да басталды.
— Қала көшелерін қыс мезгілінде күтіп ұстауға 205 миллион теңге қарастырылған. 17 ақпандағы жағдай бойынша, 220 мың шаршы метр қар шығарылды. Бұл жұмыс әлі де жалғасуда. Арықтарды тазалау мерзімінен 10 бұрын қолға алынды. Бүгінгі күні арық жүйесі бойынша жұмыс жоғары қарқынмен жүргізілуде, тәулік бойы кезекшілік ұйымдастырылған. Инертті материалдар қоры да жеткілікті. 264 тонна құм, 5 тонна инертті материал, 23 су сору бірлігі және 32 қар және жаңбыр суын соруға арналған сусорғы станциясы бар. Қала әкімінің тапсырмасына орай, қосымша қар шығару учаскелерін анықтайтын жұмыс тобы құрылған,- дейді қала әкімінің орынбасары Николай Ушаков.
Мониторинг барысында жеке сектордағы су басу қаупі бар 55 көше анықталды. Олар Дальняя, Қайым Мұхамедханов көшесі, Шығыс, Мирный, Степной аудандары. Бұл аумақтар қарқынды түрде қардан тазартылуда.
Сол сияқты Қызыл Кордон ауданында да тәулік бойы кезекшілік ұйымдастырылып, арық жүйелері бақылауға алынған. Мирный және Контрольный аудандарында тағы екі аумақ анықталып, арықтардан су жіберіле бастады.
— Үстіміздегі жылы Шығыс кентінде темір жолдан Ертіс өзеніне дейінгі аралықта жұмыс жүргізудеміз. Арық жүйесін қалыпқа келтіру жұмыстарын бастамақпыз. Сол сияқты Короткая көшесі мен Дөнентаев көшелеріндегі арықтарды түзетудің жобалық- сметалық құжаттарын жасауды жоспарлап отырмыз,- дейді Николай Ушаков.
Ал Ертіс өзеніне келетін болсақ, мамандар қауіптің жоқ екенін айтады. Қыстың жылы болуына байланысты өзендегі мұздың қалыңдығы екі айда бір өлшенді. Егер өткен жылы мұздың қалыңдығы 52 сантиметр болса, биыл бұл көрсеткіш екі есе төмен — 29 сантиметр. Шүлбі су электр станциясынан су жіберілуіне де мониторинг жүргізілуде. Бүгінгі күні мұз жару жұмыстарын жүргізуге байланысты меморандум жасалып, қаражат қарастырылған. Мұз жару жұмыстары жүргізілетін орындар белгіленіп, картасы жасалды. Алайда мұның барлығы тек мұз жару жұмыстары қажет болған жағдайда іске асырылатын дайындық шаралары. Ал мамандар болса мұз жарудың әзірге қажеттілігі жоқ екенін айтып отыр.
Семей қаласының ақпараттық орталығы{jcomments off}
