Бүгінгі таңда Семей қаласы бойынша жылу беру ісінде күрделі мәселе жоқтың қасы. Бұрынғы жылдардағыдай, тұрғындар тарапынан арыз-шағымдар да жоқ деуге болады. Осыдан он шақты жыл бұрын республикалық деңгейге дейін көтерілген проблема қазіргі таңда толықтай шешімін тапты деуге негіз бар. Әйтсе де, жергілікті жылу берушілердің айтуынша, өзекті мәселе шешілгенімен, қалалықтардың берешегін қайтару күрделі күйінде қалып тұр. Атап айтсақ, ағымдағы жылу беру маусымы бойынша, қала тұрғындары «Теплокоммунэнерго» МКК мекемесіне қыс бойы тұтынылған жылу мен ыстық су үшін 400 миллион теңгедей қарыз болып қалған.
Бұл жайында өткен аптаның жұмасы күні қалалық ақпарат орталығында болып өткен баспасөз мәслихаты барысында аталмыш мекеме өкілдері мәлім етті. Жылу берушілердің сөзіне сүйенсек, жеке тұлғалардың дебиторлық берешегі 396 миллион теңгені құраса, коммерциялық ұйымдар мен заңды тұлғалар 204 миллион теңгеден астам қарызға батқан.
— Біз халықты шотты алғаннан кейін ұзақ уақыт бойы созбалаңға салмай, әр ай сайын, мерзімінде төлем жасап отыруға шақырамыз. Қаламыздағы тұрғындардың төлем қабілеті жоғары деп саналады. Негізінен, бұл — зейнеткерлер мен бюджеттік ұйым қызметкерлері. Екі ай немесе одан да көп уақыт көлемінде тиісті төлем жасалмаса, борышкерлерге қатысты мәжбүрлеу шаралары қолданылатын болады,- дейді бұл ретте «Теплокоммунэнерго» МКК сату бөлімі басшысының міндетін атқарушы Айнұр Төлеубаева.
Оның айтуынша, 2019 жылдың ақпан айынан бастап ақша өндіру процедурасы айтарлықтай көлемде жеңілдетілген. Біріншіден, борышкер абонент алдын ала арнайы хабарлама алады. Одан соң екі аптаның ішінде орындау туралы акт жеке сот орындаушысына жіберіледі. Ал ең соңғы кезекте, егер берешек сомасы өтелмесе, борышкердің қарызына байланысты банк шоттары мен мүлкі бұғатталады. Сонымен қатар оған Қазақстан Республикасының аумағынан шығуға заңды түрде тыйым салынады. Яғни елеулі түрде шектеулер қолданылады.
Ал заңды тұлғаларға бірдей санкциялар қолданылатын болады.
— Біздің тәжірибемізде бар жағдай. Кейде белгілі бір себептерге байланысты абонент төлемді уақтылы жасай алмай қалатын жағдайлар да болып жатады. Осындай кезде «Теплокоммунэнерго» мекемесіне кепілдеме хат дайындап, кешіктіруге не себеп болғанын және қарызды қашан төлейтінін жазу қажет. Бұл да айтарлықтай жеңілдік екендігі сөзсіз, — деді өз сөзіндеАйнұр Төлеубаева.
Аталмыш баспасөз мәслихаты барысында қалалық жылу беру мекемесінің өкілдері бүгінгі таңда тұрғындар тарапынан ешқандай арыз-шағым түспегенін, ағымдағы жылу беру маусымы кедергісіз, ойдағыдай өтіп жатқанын да жеткізе кетті.
Әлібек КЕМЕЛХАН, «Семей таңы»{jcomments off}
