Семей қаласында «Көктем-2020» республикалық командалық-штабтық жаттығулары ұйымдас-тырылып, оның аясында арнайы техникалардың байқауы өтті. Жаттығуға 40 техника мен жүздеген жеке құрамның мүшелері қамтылып, тұрғын үй–коммуналдық шаруашылығының техникалары, көлік қызметі, Ұлттық ұланның, жергілікті полиция қызметінің, Төтенше жағдайлар басқармасының, жедел жәрдем қызметінің, ШҚ АЭК және «Қазтелеком» бригадалары және апатты жағдай бола қалса тұрғындарды ыстық тамақпен қамтамасыз ететін, қонақ үйлерге орналастыруды ұйымдастыратын ветеринарлық және кәсіпкерлік бөлімдері қатысты.
Айта кетейік, бүгінгі күні «Турист», «Семей» қонақ үйлерімен және «Қарағайлы» сауықтыру кешенімен меморандум жасалған.
Іс-шара аясында сонымен бірге Водный кенті аумағында да арнайы оқу- жаттығу өткізілді.
— Басты мақсатымыз — Семей өңірінде су басудың алдын алу, жаттығу барысында арықтарды, су жүйелерін, көшелерді қоқыстардан тазарту. Сонымен қатар еріген қар суы жиналуы ықтимал аумақтар тазартылады. Бұл жұмыстар шартты түрде емес, нақты атқарылады. Әзірге айтарлықтай қауіп төніп тұрған жоқ. Дегенмен су тасқынына қарсы шараларды жүргізудеміз,- дейді ТЖ басқармасының азаматтық қорғаныс тобының аға офицері Қымбат Көпбаев.
Бүгінгі күні тұрғын үй секторындағы көшелер қардан тазартылуда. Қыс басталғалы 250 мың шаршы қар шығарылды. Орталық көшелер тазартылды. Қазір жеке сектордағы Сейфуллин мен Қажымұқан көшелерінен қар шығарылуда. Жиыны 450 мың шаршы қар шығарылады деп күтілуде. Су басу қаупі жоғары аумақтар анықталып, мониторинг жүргізілді. Қала әкімі сондай-ақ кәріз жүйелері су ағынын қалыпты өткізбейтін аумақтарда және Селевин, Абай мен Қабанбай батыр көшелеріндегі жол өткелдерінде техникалық шаралар өткізу қажеттігін атап өтті.
— Су тасқынына дайын болуымыз керек. Биыл қар өте көп. Тұрғындардың айтуынша, соңғы жылдары мұндай жағдай қалада болмапты. Техникалық шаралар жүргізілді, дегенмен, қар күрт ерісе, инженерлік жүйенің дайындығына қарамастан, қауіпті жағдай туындауы мүмкін. Су соратын машиналарға тексеру жүргізілді. Бүгінгі күні 62 техника күн сайын қар шығаруда. Бұл, әрине, аз. Қаражат жетпейді, сондықтан облысқа шығып, бізге қосымша қаржы бөлуді сұрадық. Өтінішіміз қолдау тапты. Еріген қар суын сорып әуре болғанша, қазірден бастап шығарып тастауға күш салуымыз қажет,- дейді қала әкімі Ермак Сәлімов.
Екі күнге жалғасатын оқу-жаттығу барысында нақты қауіптің алдын алу үшін барлық шаралар әбден пысықталмақ. Әрине, техниканың саны ғана емес, жұмыс сапасы да маңызды.
Семей қаласының ақпараттық орталығы{jcomments off}
