Дәл қазір адамзат баласы аса бір алаңдаулы сәтті бастан кешіріп тұр… Тәж киген тажал ел арасына тайраңдай кіріп, халықты тығырыққа тіреуде… Әлеуметтік желінің де, қалта телефонымыздағы WhatsApp байланысының да бүгінгі тақырыбы тек осы дауасы табылмай отырған дерт. Біреу күн сайын қатары көбейіп жатқан науқастар санын жеткізіп жатса, ал енді біреулер осы індеттен қалай сақтану керектігі жайлы ақпаратпен бөлісуде. Бір–бірімізді демеуді қажет ететін осы қиын сәтті кейбіреулер саясат ойынына айналдырып, «қасақана жасалған жағдай» деген жалған ақпарат та таратуда.
Ақиқатын айтуымыз керек, билік те қол қусырып қарап отырған жоқ. Мектеп оқушылары демалысқа мерзімінен ерте шықты. Баласын қарайтын көмекшісі жоқ аналардың еңбекақысы сақталып, үйде отыруға мүмкіндік берілді. Студенттер қашықтықтан оқып жатыр. Тіпті несие алғандарға кешіктіріп төлегендері үшін айыппұл салынбауы мен кәсіпкерлік нысандарды салықтан босату сияқты шаралар да қолға алынды.
Бұл қазақ не көрмеген… Жұбан Молдағалиев ағамыз айтпақшы, «Мың өліп, мың тірілген Қазақпыз». Осындай қысылтаяң сәтте еңсемізді түсірмей, жел сөзге ермей, сабыр сақтаудан басқа амал жоқтығын мойындауымыз керек. Кез келген негативтің позитивті жақтарын көре білейік.
Бұрын жұмысбасты болып, балаңыздың сабағын қадағалауға уақыт таппай жүрсеңіз, бүгін сол кемшіліктің орнын толтырудың реті келді деп есептеңіз.
Дәмді тамақ дайындап, бөгде адамдарсыз, тек өз жанұяңызбен оқшауланып, алаңсыз әңгімелесетін сәт туды деп қуаныңыз.
Көптен бері жоспарлап, сәті түспей, күнде ертеңге қалдырып жүрген үйдегі жұмыстарды қолға алыңыз! Ежелгі Давос философиясына негізделген фен-шуй ілімі бойынша, рухани үйлесімділікке жету жолының басты ережелерінің бірі — үйді жинау арқылы ой-сананы реттеу дейді. Үйіңіз шашылып жатса, жағымды энергия теріс күшке айналады, ырызықты ортайтып, байлықты үркітеді, сәттіліктен алыстатады дейді фен-шуй мамандары. Шашылған үйде ойларыңыз шашыраңқы, ұйқыңыз сапасыз болатынын да естен шығармай, осы сәтті пайдаланып, реттеп алыңыз.
Бұл тек үйді ғана емес, ойды да тазалап алуға берілген мүмкіндік. Өмір болған соң, бірде біреуді ренжітсек, кейде өзіміз біреуге ренжіп жатамыз. Бір қарағанда, адамдар арасындағы қарым-қатынаста кездесетін қарапайым құбылыс болғанымен, өкпе адам денсаулығына айтарлықтай зиянын тигізіп, көптеген ауруларды қоздырып, әсіресе жүрек, өкпе, тыныс алу сияқты ең сезiмтал органдарға көп салмақ салады дейді ғалымдар. Үй шаруасын реттей жүріп ренжіген және ренжіткен адамдарыңыздың Сіздің өміріңізде алатын орнын еске түсіріңізші. Көңіліңізде осы сәтте пайда болған жылылықтан жымиып күлетініңіз сөзсіз.Сол жылуды өшірмейік!
Телефон мен компьютерге де демалыс жариялап, жанұяңызбен алдағы уақыттарға жоспар жасап, сәтті күндерде атқарылатын істерді көз алдыңызға елестетіп, тәтті қиялға беріліп, тынығыңыз.
Наурыз мерекесі де таяп қалды. Бұл күні дастарқанның басты дәмі наурыз көже мен қыстан қалған сүр болады деп ойлаймын. Наурыз көже — Ұлыстың ұлы күні жасалатын қасиетті ас.
Наурыз көжені әркім әртүрлі даярлайды. Мен, реті келіп тұрғанда, өзімнің наурыз көже дайындау әдісіммен бөлісе кетейін. Ұлыстың ұлы күні дайындалатын бұл астың құрамында түркі халықтары үшін қасиетті жеті санының сақталуын қадағалаймын. Су, тұз, ет, тары, арпа, бидай, күріш сияқты жеті түрлі дән мен құрт қосылады. Қыстан сақталған сүр және қазы — қартаның сорпасы дәмді болады. Қазанға су құйып, ет, қазы-қартаны салып, қайнатамыз. Сорпаның көбігін алуды ұмытпаңыз. 1,5 — 2 сағаттай қайнатып, етті сүзіп алыңыз. Дәндерді жақсылап жуып, суда бөлек қайнатып аламыз да, піскен соң тағы да шайып барып, сорпаға араластырамыз. Дайын болған соң оттан түсіріп, салқын жерге қойып, еттерді ұсақтап турап, барлығын сорпаға құрт қосып араластырамыз.
Наурыз мерекесін түрік халықтары бір ай тойлаған ғой. Егер Наурыз дастарқанына ұсынар ерекше тамақ дайындау әдістеріңіз болса, оқырмандармен бөлісуді ұмытпаңыздар. «Наурыз» сөзі парсы тілінен аударғанда «жаңа күн» дегенді білдіреді екен. Дана халқымыз бақыттың бастамасы, жақсылықтың жаршысы деп қастерлейтін Наурыз күні жақындарымызға жақсы тілек арнап, ренжіткен жандардан кешірім сұрауды естен шығармағанымыз дұрыс. Ең бастысы, еңсемізді түсірмейік.{jcomments off}
БҰЛ ДА ӨТЕР… ТЕК СЫН САҒАТТА САБЫР КЕРЕК…
Риза Молдашева, «Семей таңы»
