Облысымыздағы Аягөз қаласы тұрғындарының саны мен орналасу тығыздығы бойынша Өскемен мен Семейден кейінгі үшінші орында тұр. Демек, қазіргідей пандемиялық ахуал жағдайында Аягөз қаласы тұрғындарының қауіпсіздігін қамтамасыз ету аса маңызды. Бүгінгі күндері қаланың орталық көшелерінде, сауда орындары мен бірқатар нысандарда коронавирусқа қарсы дезинфекция жұмыстары жүргізіліп, қоғамдық орындар толықтай залалсыздандырылды.
Аудан әкімі Ділдабек Оразбаевтың айтуынша, дезинфекциялық жұмысқа шаһарда орналасқан әскери бөлімнің қызметкерлері жұмылдырылған.
– Аягөз қаласы бойынша дезинфекциялық жұмыстар таңғы сағат 7-де басталып, 11-ге дейін жалғасты. Қажетті құрал-жабдық, негізінен, әкімдік тарапынан берілді. Сондай-ақ 16443 әскери бөлімі базасының «Рубеж» деп аталатын құралы да қолданылды. Арнайы құрылған екі топ осылайша күні бойы жұмыс істеді. Сонымен қатар заласыздандыру жұмыстарына 10810 әскери бөліміндегі танк бригадасы мен 36376 резервтік бригаданың екі арнайы көлігі пайдаланылды, — дейді Аягөз ауданының әкімі Ділдабек Оразбаев.
Залалсыздандыру шаралары бірінші кезекте тұрғындар көп жүретін орталық көшелер бойында жүргізілді. Одан соң автовокзалда, сондай-ақ темір жол вокзалы мен перронда да жалғасты. Сол сияқты базарлар мен жәрмеңке өткізілетін алаңда, автобус аялдамаларында дезинфекция жасалды.
Залалсыздандыру жұмыстарының жүргізілетіні жайында тұрғындар алдын ала әлеуметтік желілер арқылы хабардар етілгендіктен әрі бұл шаралар демалыс күні ұйымдастырылғандықтан қала көшелері мен қоғамдық орындарда қолайсыздықтар туындаған жоқ. Қала басшылығының айтуынша, жүргізілген шараларға жергілікті тұрғындар да түсіністік танытып, кедергі келтірмеген. Коронавирус індетіне тосқауыл қоюға бағытталған санитарлық шаралар алдағы уақыттарда да жүргізілетін болады.
— Барлық шаралар жергілікті атқарушы билікпен келісіліп, санитарлық нормаларға сай ұйымдастырылды. Осындай сын сағатта бір-бірімізді қолдайық. Біз біргеміз!- дейді әрдайым қол ұшын беруге әзір тұратын аягөздік белсенді азаматтар.
Ауданда сонымен қатар халықты қатерлі инфекциядан сақтану жолдары туралы ақпараттандыру мақсатында қарқынды жұмыстар жүргізілуде. Мәселен, Жастар ресурстық орталығының белсенділері жуырда қаладағы барлық көп қабатты үйлердің кіреберістеріне коронавирустың алдын алу шаралары көрсетілген жаднамаларды іліп шықты. Сонымен қатар жергілікті «Қазпочта» АҚ-ның Аягөз қалалық бөлімшесіне халыққа тарату үшін 10 000 дана жаднама қағаздарын беріп, індеттің таралмауына мүмкіндігінше үлестерін қосуда.
Өз тілшіміз{jcomments off}
