Семей қаласында әлеуметтік маңызы бар 19 азық-түлік бағасын тұрақты сақтап қалу мақсатында қалалық әкімдік пен сауда нүктелері арасында меморандум жасалды. Бүгінгі таңда 208 меморандумға қол қойылған.
Сонымен қатар тұрақтандыру қорынан жеміс-жидектер мен көкөністерді жеткізу бойынша да екі жақты келіссөздер жасалды.
— Қазіргі уақытта қаланың қоймалары мен сауда нысандарында азық-түлік тауарлары жеткілікті. Тұрақтандыру қоры жұмысын жалғастыруда. Жеміс-көкөніс өнімдерін жеткізуге 43 меморандум жасалды. Арнайы сауда нүктелерінде қор өнімдері 77 теңгеден қымбат емес бағада сатылып жатыр, — дейді Семей қалалық кәсіпкерлік бөлімі басшысының орынбасары Анжела Маслова.
Десе де азық-түлік өнімдері бағасы біртіндеп қымбаттауда. Дүкен иелерінің айтуынша, көтерме саудамен айналысатын кәсіпкерлер тауар бағасын біраз көтерген екен.
— Мәселен, бір бөлке нан-ды осыдан 1-2 апта бұрын 80 теңгеден сатып алып, 90 теңгеге саудалайтынбыз. Қазір 85 теңгеден сатып алып, үстіне 5 теңге қосып қана сатудамыз. Қант, ұн, өсімдік майы — барлығына 20-30 теңгеден қосылып жатыр. 2 келі ұн 390, бір келі қант 260 теңгеге шықты, — дейді Ақерке есімді дүкен иесі.
100 теңге тұратын картоп пен сәбіздің келісі де 150-160 теңгеге көтеріліпті. Ал қарапайым халық әсіресе ұн бағасының қымбаттығын баса айтуда.
— Жиырма бес келілік жоғары сортты ұн бағасы 3600 теңгеден саудаланған болса, қазір 4000 теңгеден жоғары. Енді бірінші сортты ұнды 3600 теңгеден алып отырмыз. Ал ауылдық жерлерде елу келі ұн бағасы 7000 теңгеден асты, — дейді Мөлдір есімді қала тұрғыны.
Қала тұрғындарының көпшілігі тұрақтандыру қорының өнімдері қай сауда нүктелерінде сатылатынынан бейхабар болғандықтан да қымбат бағадағы көкөністерді сатып алуда. Әкімдік пен сауда нүктелері арасында меморандум жасалғанымен, бірқатар дүкендерде әлеуметтік маңызы бар азық-түліктердің бағасы тұрақты болмай отыр.
Жадыра ТӨЛЕГЕНҚЫЗЫ, «Семей таңы»{jcomments off}
