Тарбағатай өңірін мекендеген қалың ел төтенше жағдай кезінде қоғамдық тәртіпті қатаң сақтап, «үйден шықпау» туралы талапты орындап отыр. Аудан әкімі Серікқазы Садуақасовтың тікелей бақылауында тұрған өңірдегі коронавирустың алдын алу шараларының сақталуын қадағалау, жағдайы төмен отбасыларға қолдау көрсету мақсатындағы жұмыстарды ұйымдастыру ауылдық округ әкімдеріне тапсырылған.
Осы орайда бірнеше ауыл әкімдерімен онлайн форматында байланысып, ауылдағы ахуал жайлы сұраған едік.
Ақжар ауылының әкімі Асқар Боғырбаев:
— Ауылдың бүгінгі таңдағы тыныс-тіршілігі қазіргі төтенше жағдай талаптарына толық сай келеді. Азаматтардың көшелерде бейсауат жүрісі күрт тыйылған. Сауда орындарына келушілер керек-жарағын алып, ізінше кері қайтады. Жуырда ауылдағы Байжігіт баба мешітінің имамы А.Жарасов зекет қоры есебінен Қазақстан мұсылмандары діни басқармасының жобасы бойынша Ақжар ауылының тұрғыны Күләш Смағұловаға қаржылай көмек көрсетіп, бір бөлмелі үй сатып алуына жәрдем жасады. Сонымен қатар «Жүрек жылуы», «Біз біргеміз» акциялары бойынша да игілікті істер атқарылып жатыр. 30 отбасыға 90 мың теңгенің азық-түлік себеті тапсырылды. Ақжар ауылының көшелерін тазалауға қуатты техникалар шығарылды.
Маңырақ ауылының әкімі Абылхайыр Қожахметов:
— Ауыл тұрғындары төтенше жағдай талаптарын толық сақтап отыр. Азаматтар өз үйінің аулаларына, мал қораларына ғана шығып, шаруашылығын реттеп жатады, бейсауат жүрген ешкімді байқамайсыз. Ауыл халқының әлеуметтік жағдайы, тыныс-тіршілігі жіті бақылауда. Осы ауылдың тумасы Бауыржан Әділұлы осындай қиын шақта жерлестерін қолдау мақсатында 40 қап ұн, 50 литр сұйық май, 50 пакет ұн өнімдерін көп балалы отбасыларға таратып берді.
Қарасу ауылының әкімі Шалқар Муслимов:
— Еліміздің барлық аймақтарындағы сияқты біздің Қарасуда да толық тыныштық орнаған. Жиын-тойлардың бәрі кейінге шегерілген. Қауіптен сақтану өзінің ғана емес, жақынының, баласының, халқының амандығы үшін қажет екенін түсінген ауылдықтар бейсауат жүрісті доғарған. Ауылдағы Жұмық баба мешітінде «Қараша» шаруа қожалығының жетекшісі Бауыржан Қанафиановтың демеушілігімен коронавирус індетіне қарсы дұға оқылып, ірі қара малы құрбандыққа шалынды. Ұйымдастырушылар сойылған малдың етін 38 отбасыға таратып берді.
Ақсуат ауылының әкімі Ғалымжан Нұғиев:
— Ақсуаттағы әлеуметтік жағдай күнделікті көз алдымызда. Бүгінгі күні негізгі мақсатымыз жұқпалы аурудан сақтану шараларын ұдайы насихаттау, төтенше жағдайда қойылған талаптардың тұрғындар тарапынан орындалуын қадағалау болып отыр. Шеттен келген көліктер ауылға кіреберіс бекетте тоқтатылып, жолаушылар дәрігерлердің бақылауынан өтеді. Жуырда Бегебай Жарылқасынов бастаған бір топ кәсіпкерлер 3 бас ірі қара малын құрбандыққа шалды. Ұранхай қажы мешітінің бас имамы Айдын қажы Құсманұлы індеттің таралмауын, әр отбасының амандығын тілеп дұға жасады. Құрбандық малдың еті әлеуметтік жағынан аз қамтылған 115 отбасыға тең бөлініп, таратылды.
Хамза СӘТИЕВ, «Семей таңы»{jcomments off}
