Бүкіл әлем елдерін алаңдатып отырған коронавирус індетіне байланысты Үржар ауданында да сақтық шаралары күшейтілді. Аймақ басшысы Даниал Ахметовтің тікелей тапсырмасына сәйкес, адам көп жиналатын орындарда санитарлық-гигиеналық жұмыстар жүргізілуде. Аудан әкімі Нұржан Тоқсейітов жақында 0-92 блокбекеттерінде болып, жағдайды бақылап қайтты, жауапты мамандарға ауданға қарай ағылған көліктер мен жолаушылардың жан-жақты тексерістен өтуін жіті қадағалауды қатаң тапсырды.
— Блокбекетке өзім арнайы барып қайттым. Медицина және құқық қорғау қызметкерлері тарапынан атқарылып жатқан жұмыстармен танысып, нақты тапсырмалар бердім. Қазіргі күні аталмыш бекеттер 24 сағат кезекшілік жасап тұр. Жағдай біздің назарымызда, – дейді аудан әкімі.
Үржар ауданындағы мемлекеттік мекемелер мен халық көп шоғырланатын сауда нүктелері, базарлар, автобекет, саябақтар, мейрамханалар, дүкендер және басқа да қоғамдық орындарға залалсыздандыру жұмыстары жүргізіліп жатыр. Атап айтсақ, «Гүлназ», «Сұңқар», «Зияда», «Ыстық нан» және тағы басқа да сауда орталықтары күшейтілген жүйеде жұқпалы дертпен күресті мықтап қолға алуда. Дүкендердегі азық-түлік бағасы да тұрақты. Барлық сауда орталықтарына кіре қалсаңыз, сатушылар арнайы бетперде және қолғаптармен қызмет көрсетеді.
— Бұл біздің қауіпсіздігіміз үшін өте маңызды. Шағын дүкенге келсін я болмаса үлкен базарға келсін кез келген адам міндетті түрде бетперде киіп жүргені абзал. Қазақта «Сақтаңсаң, сақтайды» деген жақсы сөз бар. Осы ретте барлық тұрғындарды ұлт саулығы үшін қауіпсіздік шараларын қатаң ұстануға шақырамын. Ал балаларымды мүлде дүкендерге жібермеймін,- дейді аудан тұрғыны.
Сақтық шарасына жете мән бергендердің қатарында «Сұңқар» сауда орталығы да бар. Аталған дүкен кемінде екі сағат сайын орталық ішін хлор ерітіндісімен жуып, есік тұтқасына жиі ауыстырылып тұратын дезинфекцияланған матаны байлап қойған. Шағын маркет басшысы Ақиқат Кәрім талаптарға сәйкес өз еңбеккерлерінің сақтық ережелерін мұқият орындауын қадағалаумен қатар, тұтынушылардың қауіпсіздігін де қамтамасыз етуде. Бұнда да азық-түлік құны тұрақты. Нан, басқа да өнімдер арнайы пакеттерге салынып босатылуда.
— Жұқпалы дертке қарсы пәрмен күшейтілді. Шағын маркет сатушыларының, сондай-ақ дүкен тұтынушыларының бетперде киюі, олардың тазалыққа ерекше мән беру мәселесі күнделікті ескертілуде. Әрбір тұтынушыдан соң дезинфекция жасап жатырмыз. Дүкенімізде баға тұрақты. Дегенмен қаладан әкелінген кейбір тауарлардың бағасы 5-10 теңгеге қымбаттады, — дейді А.Кәрім.
Аудандағы бірқатар ірі дүкендердің сатушылары, сауда орындарының иелері әкімдікпен жасалған меморандум шеңберінде азық-түлік бағасын тұрақты ұстап отыр. Айта кету керек, осыған байланысты арнайы комиссия құрылып, баға тұрақтылығын бақылау жұмыстары қарқынды түрде жүргізілетін болады.
Ақерке АЛТЫНБЕКОВА, «Семей таңы»{jcomments off}
