Өткен аптада, елдегі шектеулерге қарамастан, орманды өлкені бетке алып, «Біздің Бесқарағай» атты жаңа басылым жолға шықты.
«БІЗДІҢ БЕСҚАРАҒАЙ» — ел арасына елдіктің сөзін айтуға аттанды.
«БІЗДІҢ БЕСҚАРАҒАЙ» — ежелден шаруасы шалқыған, құнарлы жеріне құт дарып, берекелі еліне бақ қонған, желісіне қасиет байланған өңірдегі ақжолтай жаңалықтың жаршысы болу үшін қарағайлы өлкеге бағыт алды.
«БІЗДІҢ БЕСҚАРАҒАЙ» — ауданның экономикалық тұрғыдан жеткен жетістігін, әлеуметтің әлеуетін, Елбасының сарабдал саясатын, тарихын, өңірдің бүгінгі тыныс-тіршілігін жалпы жұртқа жеткізумен бірге, оқырмандар үшін тағылымы мол дүниелер мен қоғамды тәрбиелейтін мақалалар жариялауды мақсат етіп, атқа қонды.
Жаңа газет бесқарағайлықтар үшін билік пен халық арасын жалғап тұрған алтын көпір, қоғамдық ойдың қозғаушы күші болуды мақсат етіп отыр. Газеттің қоғамдағы рөлінің қаншалықты маңызды екені баршаңызға мәлім. Газет бетінде жарық көретін әр мақаланың сапалы болуы газет беделін арттыра түсері сөзсіз.
«Біздің Бесқарағай» газетінің редакциясы Бесқарағай ауданының орталығында, өңір халқымен тығыз байланыста болуды жоспарлап отыр.
Қуаныш ҚОЖАЕВ, «Семей таңы»{jcomments off}