Облыстағы сауда желілерінің қоймаларында 9,5 мың тоннадан астам әлеуметтік маңызы бар тауар қоры бар. Шығыс Қазақстан облысы Статистика департаментінің ресми мәліметтеріне сәйкес, облыста әлеуметтік маңызы бар азық-түлік тауарларына баға индексі 103,2%-ды құрайды, бұл ел бойынша орташа көрсеткіштен 1,6%-ға төмен.
Кәсіпкерлік және индустриялық-инновациялық даму басқармасы басшысының орынбасары Ольга Григорьеваның айтуынша, жыл басынан бері аймақта бес түрлі өнімнің — қырыққабат, қант, сиыр еті, қарақұмық жармасы және нан бағасы өскен. Басқа әлеуметтік маңызы бар азық-түлік тауарларының бағалары тұрақты.
Айта кету керек, қалалар мен аудандардың әкімдіктері өндірушілермен, тауар жеткізушілермен және сауда орындарымен бағаны тұрақты ұстап тұру мақсатында меморандумдар жасасқан. Облыста негізгі әлеуметтік маңызы бар тауарлар ең төменгі үстемеақымен саудаланатын 79 әлеуметтік дүкен және 500 әлеуметтік бұрыш бар.
Өскемен және Семей қалаларының тұрғындарын 2019-2020 жылдардың қыс-көктем айларында жеміс-көкөніс өнімдерімен, соның ішінде картоп, сәбіз, пияз, қырыққабатпен қамтамасыз ету үшін облыстың тұрақтандыру қоры 5700 тонна жеміс-көкөніс өнімдерін сатып алған. Жалпы, облыстың тұрақтандыру қоры қоймаларында 820 тонна көкөніс, 529 тонна қант бар.
Шығыс Қазақстан облысындағы сауда желілерінің қоймаларындағы әлеуметтік маңызы бар тамақ өнімдерінің қоры 9607 тоннаны құрайды.
Әлеуметтік маңызы бар тауарлардың бағасын тұрақты ұстап тұру үшін күнделікті баға мониторингі жүргізіледі. Бұл тауарларға бағаны негізсіз көтерген жағдайда, мемлекеттік органдар тарапынан бәсекелестікті қорғау саласындағы заңнамаға сәйкес шаралар қабылданады
Айта кетерлігі, биыл егіс алқабы 1367 мың гектарды құрайтын болады, бұл өткен жылмен салыстырғанда 6,8 мың гектарға артық. 2020 жылы топырақ құнарлылығын арттыру үшін облыс шаруашылықтары тарапынан минералды тыңайтқыштардың барлық түрлерінен 30 мың тонна сатып алу жоспарланған. Егіс жұмыстарына қажетті техникалар, тракторлар жеткілікті. Павлодар мұнай өңдеу зауытынан 30 мың тонна дизель отыны бөлінді.
Қазақстан Республикасының Президенті Қасым-Жомарт Тоқаевтың тапсырмасына сәйкес дизель отынының бағасы тоннасына 184 мың теңгеден 174 мың теңгеге дейін төмендетілді.
Көктемгі дала және егін жинау жұмыстарын сәтті жүргізу мақсатында 2020 жылы облыстық бюджеттен 5,4 млрд теңге бөлінді, бұл 2019 жылға қарағанда 1,9 млрд теңгеге артық.
ШҚО аймақтық коммуникациялар қызметі ақпараты негізінде әзірленді{jcomments off}
