Семей қаласының Жастар ресурстық орталығының еріктілері жыл басынан бері республикамыз бойынша қолға алынған «2020 қайырымды іс» акциясы аясында «Ардагерлерді ардақтайық!» атты ерекше жобаны жүзеге асыра бастады. Атап айтсақ, орталықтың белсенділері қалада тұратын соғыс ардагерлеріне, тыл еңбеккерлеріне, Ленинград блокадасында болғандарға арнайы сыйлықтар таратуда.
Жастар орталығының белсенділері әуелгі кезекте еңбек ардагері, қарт майдангер Дмитрий Литвиненконың үйіне келді. Өңіріне Қазақстан туы түстес көгілдір Жеңіс лентасын таққан соғыс ардагері есікті өзі ашып, еріктілерді құрметпен қарсы алды, жүзінен жас буынға деген ризашылық пейілі сезіліп тұрды. Қарттың денсаулығы жақсы, әлі тың екен. Қазақ тілінде жатық сөйлейтін қария амандық сұрай келген жас теміржолшыларды сөзге тартты. Соғыс даласында түскен жастық шағындағы фотосуреттерін көрсетіп, қаруластарын, кейіннен өзі қызмет еткен мекемедегі еңбек жолы мен әріптестерін, өткен күндерді еске алған қарт майдангер жастарға баталы тілегін де білдірді.
-Қаламыздың еріктілері бірлесіп «Ардагерлерді ардақтайық!» жобасы бойынша жалпыреспубликалық «Біз біргеміз!» акциясы аясында Семей қаласында тұратын жалпы саны 25 соғыс ардагеріне арнайы әзірленген сыйлықтарымызды жеткіздік. Әңгіме-дүкен құрып, өмір жолдары жайлы сұрастырдық. Расында, майдангерлер арамызда аз қалыпты. Сол қарт жауынгерлердің әңгімелері біз үшін ерекше әсерлі болды. Кейінгі буынға өнеге болсын деп, барлығының соғыс жылдарындағы, соғыстан кейінгі кездегі темір жол саласын өркендетуге қосқан үлестері, еңбек жолдары жайлы бейнетүсірілімдер жасадық. Қазіргі уақытта деректі фильмдер әзірлеу үстіндеміз. Бұл жұмыстардың барлығы әлеуметтік желілер арқылы көрсетілетін болады. Бұл тек бастамасы ғана,- дейді аталмыш іс-шараны ұйымдастырушылардың бірі, еріктілер ұйымының жетекшісі, жігерлі де белсенді жас Бауыржан Мұратұлы.
Соғыс ардагерлерінің арасында қилы тағдыр иелері бар екен. Бірі Батыс майданында Берлинге дейін жетіп, Жеңіс туын желбіреткен соң Қиыр Шығыстағы соғысқа аттанып, екі бірдей майданның жауынгері атанса, енді бірі Балтық теңізіндегі сүңгуір кемеде матрос болып, қиян-кескі ұрысқа қатысқан.
Айта кетерлігі, жастардың барлығының да қалалық әкімдік тарапынан төтенше жағдай кезінде қала ішінде жүріп-тұру үшін берілген рұқсаттамалары бар. Ардагерлерге құрмет көрсету шаралары алдағы 9 Мамыр — Жеңіс күніне дейін жалғастырылмақ.
«Самұрық-Қазына» әл-ауқат қорының демеушілігімен ұйымдастырылған осынау игілікті шара соғыс ардагерлерінің де, олармен жүздескен жастардың да есінде ұзақ уақыт сақталары анық. «Жақыныңа жапқан шапаның оның арқасын жылытса, өзіңнің жүрегіңді жылытады» деген ежелгі қазақ тәмсілі осындайда айтылса керек.
Азамат ЕРСАЙЫН, «Семей таңы»{jcomments off}
