Бүгінгі таңда Семей қаласында тіркелген жағдайларға байланысты КеАҚ «СМУ» Балалар жұқпалы аурулар кафедрасының ассистенті, қауіптілігі аса жоғары болып саналатын 1-санатқа жататын жұқпалы ауруларды емдейтін стационарда коронавируспен сырқаттанған науқастарды емдеуге кіріскен алғашқы дәрігерлердің бірі Ернат Смаиловпен байланысқа шығып, өңірімізде бүгінгі таңда коронавируспен ауырғандарды емдеу және анықтау бағытында жүргізіліп жатқан жұмыстары жайында баяндап беруін сұраған едік:
— Шығыс Қазақстан облысы, соның ішінде Семей қаласының жұқпалы аурулар қызметі белгіленген мерзімде COVID-19-ға қарсы шараларға дайын болды. Семей қаласы Жұқпалы аурулар ауруханасының емдеу ісі бойынша директорының орынбасары, инфекционист дәрігер К.Исабаеваның басқаруымен аталмыш жылдың қаңтар айынан бастап «СМУ» КеАҚ кафедра асситенттері ұйымдастырған COVID-19-дың клиникасы, емі, диагностикасы тақырыбына медициналық қызметкерлерді оқыту, пандемиядан сақтану үшін арнаулы киім кию алгоритмі сияқты дағдылармен машықтанды. COVID-19-бен сырқаттанған науқастарды тасымалдау, емдеуге жатқызу алгоритмінің бағыты қалыптасты, жүйеленді.
Семей қаласының Жұқпалы аурулар ауруханасында ақпан айынан бастап COVID-19-ға күдікті деген науқастар емдеуге жатқызылып, тестік сынамалар алына бастады. Облыс әкімі Даниал Ахметовтің тапсырмасымен Семей қаласының жұқпалы аурулар ауруханасының коронавирус бөлімінің палаталарына жөндеу жұмыстары жүргізілді. Д.Даулбеков басқаратын Семей қаласы Жұқпалы аурулар ауруханасында медициналық қызметкерлерге арналған жеке қорғаныш заттары пандемиаға қарсы киімдермен толыққанды жабдықталды, дәрілік заттармен қамтамасыз етілді. Екі инфекционист дәрігер — Қ.Малгаждарова, анестезиолог-реаниматологтар Ж.Букашев және Д.Карабаев, медбикелер және кіші медициналық қызметкерлер екі ауысыммен тәулігіне, түнгі кезекшілікті қоспағанда, 12 сағат жұмыс істедік. Костюм 3-4 сағат сайын кезең — кезеңмен ауыстырылды. Бастапқы кезде арнайы киіммен жұмыс істеу, көзілдіріктің булануы, респиратормен дем алу кезіндегі тыныстың тарылуы сияқты қиыншылықтар болды. Уақыт өте келе үйрендік, басты мақсат жеке бас қауіпсіздігі үшін індетке қарсы киім кию және шешу алгоритмін қатаң сақтау еді.
Аймақ тұрғындарына айтарым: коронавирустың алдын алу үшін карантин ережелерін сақтап, оқшаулану қажет. Сондықтан дәрігер ретінде барша қала тұрғындарынан үйде отыруларын сұраймын, – дейді дәрігер дейді Ернат Смайлов.
Бүгінгі күні пандемияны шақырған КОРОНАВИРУС, COVID-19-дан толыққанды сауығып шыққан наустардың алды үйлеріне оралуда. Бұл – дәрігер үшін маңдай тердің ақталғаны, командалық жұмыстың, дәрігерлердің ұйқысыз өткізген түнерінің, жанкешті еңбегінің нәтижесі деп білеміз.
Облысымызда коронавирус дерті бойынша науқастардың қосылып жатқаны алаңдатады. Шығыс Қазақстан облысында, соңғы ақпараттар бойынша, аталған инфекция Шығыс Қазақстанның тағы үш тұрғынында тіркелген. Қауіпті дерттің 2-еуі Семей қаласында анықталып отыр. Атап айтқанда, ауруханадан тыс жағдайда пневмониямен ауырған 1984 жылғы әйел адамнан алынған скринингтік ПТР тестілеу оң нәтиже көрсеткен. Коронавирустың екінші жағдайы 1972 жылы туған әйел адамда профилактикалық тексеру барысында анықталған.
Өскемен қаласының 1949 жылғы тұрғыны, әйел адам, алгоритмге сай СОVID-19-ға 21 сәуірде коронавирус расталған науқаспен байланыста болған тұлға ретінде тексеріліп, ПТР талдауы оң нәтиже көрсеткен.
Қазіргі уақытта науқастар арнаулы стационарға оқшауланып, қажетті ем алуда. Үш жаңа жағдай бойынша 6 ауру ошағы анықталған. 33 байланыста болған адам тіркелген. Жалпы, осы уақытқа облыс бойынша 15 жағдай тіркелді.
Бүгінгі таңда аймағымыз бойынша 5 адам, соның ішінде Семей қаласындағы Жұқпалы аурулар ауруханасында ем алған ағайынды екі жасөспірім ауруханадан шығарылды.
Үміт ШӘРІПОВА, «Семей таңы»{jcomments off}