Елімізде төтенше жағдайдың жариялануына байланысты Үржар ауданында да діни, мәдени — көпшілік, бұқаралық шараларды өткізу уақытша тоқтатылған. Коронавирус індетінің алдын алу мақсатында аудан тұрғындарына 10 мыңға жуық жаднама мен нұсқаулықтар таратылды. Ақпараттық жұмыс «Фейсбук», «Инстаграм» әлеуметтік желілері және WhatsApp мессенджері арқылы да жүріп жатыр.
Аудан әкімшілігінің, жұмыспен қамту орталығының мамандары шектеу шараларының енгізілуіне байланысты халыққа түсіндіру жұмыстарын жүргізіп, тәртіпті қатаң түрде сақтауға шақыруда.
— Әлеуметтік желілерге 15-тен астам бейнеөтініш, 70-тен астам инфографика салынды. Тұрғындарға облыстық «Дидар» және «Рудный Алтай» газеттерінің, аудандық «Уақыт тынысы/Пульс времени» газетінің арнайы шығарылымдары таратылды. Коронавирустың алдын алу бойынша ақпараттық хабарламалар 100-ге жуық материал әлеуметтік желілерде орналастырылды және 195 топта WhatsApp мессенджері арқылы таратылған,– дейді Үржар ауданы әкімінің орынбасары Біржан Тұрлыбеков.
Аудандық мешіт имамы Ұлан Шраинбеков тұрғындарға төтенше жағдай кезінде діни жоралғыларды уақытша тоқтата тұрудың маңыздылығын түсіндіріп, жұмыстар жүргізуде. Әлеуметтік желілерде ҚМДБ материалдары жарық көрді. Аудандық ішкі саясат бөлімінің мамандары ауылдық округтердің тұрғындарымен түсіндіру жұмыстарын жүргізуді жалғастыруда. Аудандағы ғимараттардың алдында жолақтар сызылған, осы арқылы тұрғындар 1 метр арақашықтықтықты сақтай отырып, кезекке тұрады. Аудан әкімі Нұржан Тоқсейітов халықтың жағдайын білу үшін «Қазпошта» ғимараты мен банк мекемелерін, блокпостарды аралап, жұмыстарына бақылау жасап шыққан болатын. Әлеуметтік желілерде жазылған халықтың пікірін де ескеріп, мұқтаж жандардың үйлерін аралап, жауапты орындарға тапсырмалар беруде.
Айта кету керек, қазір, бұрынғыдай емес, төтенше жағдай жарияланғаннан бері көшедегі халық қарасы азайған. Сауда үйлері де толықтай жабылып, дүкендерде адам саны азайдған.
Бұл күндері полиция қызметкерлерінің де жұмысы көбейген. Халықтың аудан аумағына кіріп-шығуына шектеу қойылғандықтан, блокпостарда әрбір көлік тексеруден өтіп, қозғалыс қатаң бақылауға алынған. Блокбекеттерде төтенше жағдай бөлімінің арнайы жылыту көлігі қойылып, дәрігерлер жолаушылардың денсаулығын тексеруден өткізу үшін арнайы күрке тігілген.
Тәртіп сақшылары ауданда шектеу шараларының енгізілуіне байланысты көліктер мен тұрғындардың рұқсаттама қағаздарын тексеріп, төтенше жағдай талаптарының орындалуын қадағалауда. Кешкі рейдтер ұйымдастырылып, аудандық Жастар ресурстық орталығының еріктілер тобы, «Тарбағатай» МҰТП ұжымы өкілдері, өрт сөндіру бөлімшесі, мектеп ұстаздары мен ауылдық округ мамандары да полиция бөлімшесі қызметкерлеріне көмек көрсетуде.
Бүгінде «Nur Otan» партиясының Үржар ауданындағы филиалының ұйымдастыруымен аз қамтылған көп балалы отбасыларға, ардагерлерге, мүгедек жандарға азық-түлік пен ет таратылуда. Аудан әкімі Нұржан Тоқсейітовтің басшылығымен ұйымдастырылып отырған қайырымдылық шараларына ауданымыздың ерікті жастары, меценаттары көмек қолын созуда.
А.БЕРІКҚЫЗЫ
