«Коронавирусқа шалдыққан науқасты емдеудің тиімді тәсілдері». Семей мемлекеттік медицина университеті ғалымдарының жаңа әдістемелік нұсқаулығы осылай аталады. Нұсқаулықты медицина ғылымдарының докторлары Марат Сыздықбаев, Саят Таңатаров, Ерсін Жүнісов құрастырған. Ғылыми еңбекте аталған вирусты жоятын ең тиімді ем түрлері зерттеліп, оны рет-ретімен қолдану жолы жазылған.
Ғалымдардың сөзіне қарағанда, бұл нұсқаулық жеке және әлемдік тәжірибеге негізделіп жасалған. Онда Дүниежүзілік денсаулық сақтау ұйымының, Қытай, Америка, Еуропа елдерінің мамандары жариялаған деректер қолданылған. Әдістемелік еңбекте шұғыл көмек және қабылдау бөлімшелерінде науқастың ауру деңгейін, тыныс алу жеткіліксіздігін ескере отырып, госпитальдық кезеңде және анестезиология, реаниматология, қарқынды терапия бөлімінде науқасты сұрыптау жолдары ұсынылған. Қазақ, орыс, ағылшын тілдерінде жарық көрген еңбекте коронавирустық инфекцияның қарқынды терапиясының негіздері және әртүрлі асқынулар, ОРДС (жіті респираторлық дистресс-синдром), пневмония, сепсис, септикалық шок және тағы басқа тақырыптар қарастырылған. Сондай-ақ коронавирустық инфекцияны емдеуде дәрілердің өзара әрекеттесуі және қарсы көрсеткіштері ұсынылған екен. Негізінен, аталған құрал анестезиолог-реаниматолог және қабылдау бөлмесінің, шұғыл көмек көрсететін және коронавирус инфекциясын емдейтін ауруханалардың дәрігерлеріне арналған.
Жаңа әдістеме өз нәтижесін беріп те үлгерді. Семейлік дәрігерлер ұсынған тың тәсілмен емдеудің арқасында жақында Семейде ауыр халде жатқан науқас құлан таза айығып шыққан. Қазір әлем елдері індетті емдеудің тиімді жолын тауып, жаңалығын ашық түрде жаһанға жария етуге әзір отыр. Мұндай кезеңде семейлік дәрігерлердің індеттің бетін қайтаруға ұмтылыстарының маңыздылығы айтпаса да түсінікті.
Тағы бір айтатын жайт, медицина университетінің мамандары коронавирус індетіне шалдыққан адамның тыныс жолдарын зерттейтін ларингоскоптың жаңа түрін де жасап шығарған. Шетелде құрастырылатын бұл құрылғының бағасы да қымбат. Сондықтан бүгінде жаңа құрылғыға қол жеткізу де оңай емес. Осы орайда семейлік мамандар бұған дейін қолданылып келген қарапайым ларингоскопқа камера мен смартфонды жалғау арқылы құрылғыны жетілдірген. Медициналық құрылғының патенті жақында дайын болмақ.
Республикамыздағы сапалы медицина мамандарын даярлайтын бірден-бір іргелі оқу орнының мамандары жұқпалы індетті тиімді емдеудің жолдарын қазір сандық технология көмегімен іске асыруда. Семейдегі инфекциялық ауруханалардағы дәрігерлерге онлайн түрде 24 сағат бойы кеңес беретін арнайы топ құрылған. Жергілікті ғалымдар мұндай көмекті еліміздің кез келген өңірінде індетпен күресіп жатқан дәрігерлерге көрсетуге әзір.
Үміт ШӘРІПОВА, «Семей таңы{jcomments off}
