Өткен аптада Семей өңірінің медициналық мекемелеріне Қытай мемлекетінен сатылып алынған қорғаныш құралдары мен экспресс-тестілер жеткізілді.
— Біздің облыс қысқа мерзімде қытайлық әріптестермен ынтымақтастық орнатып, қажетті медициналық тауарларды сатып алды, — деді Даниал Ахметов.
Облыс басшылығы тарапынан қабылдаған шаралар бүгінгі күнде Шығыс Қазақстан тұрғындарының денсаулығы мен өмірін сақтау үшін алдыңғы шепте еңбек етіп жатқан медицина қызметкерлері мен санитарлық-эпидемиологиялық қызмет мамандарын қорғаныш құралдарымен қамтамасыз етуге мүмкіндік береді.
— Семей өңіріндегі медициналық мекемелер үшін қорғаныш костюмдері, көзілдірік, бетперде, қорғаныш экрандары және қолғаптар әкелінді. Сондай-ақ коронавирустық инфекцияға күдікті контингентті жедел анықтауға мүмкіндік беретін экспресс-тестілер жеткізілді,- дейді денсаулық сақтау басқармасы басшысының орынбасары Владимир Ли.
Жеке қорғаныш құралдары медицина қызметкерлерінің қауіпсіздігін қамтамасыз етеді. Мамандардың айтуынша, Уханьдағы дәрігерлер дәл осындай қорғаныш костюмдерімен жұмыс істеген.
Қорғаныш құралдарымен облыстың инфекциялық, провизорлық және обсервациялық стационарлары қамтамасыз етілмек. Қорғаныш костюмдері мен экрандардына алғашқы болып Семей қаласының медициналық жедел жәрдем станциясының қызметкерлері баға берді.
— Бұл — өте ыңғайлы қорғаныш костюмдері. Бізге қамқорлық көрсеткен облыс басшылығына үлкен алғысымызды айтамыз, — дейді медицина қызметкерлері.
Экспресс-тестен алдымен қауіпті аурумен күресте алдыңғы шепте жүрген азаматтар — медицина мамандары мен құқық қорғау және санитарлық-эпидемиологиялық органдардың қызметкерлері өтетін болады.
Семей қаласының ақпараттық орталығы{jcomments off}
