Ауыртпашылық бірігіп көтерсе жеңілдейді. Еліміздің оңтүстігіндегі Мақтаарал ауданындағы су тасқыны семейліктерді де бейжай қалдырмады. Қысылтаяң сәтте қол ұшын созуға ниетті ағайынның саны күн санап артып келеді. Өткен аптада Семей қаласында су тасқынынан зардап шеккен Мақтаарал ауданының тұрғындарына көмек беру акциясы басталды.
Аталмыш шараға тек семейлік белсенділер мен еріктілер ғана емес, Әнет баба Кішікұлы атындағы қос мұнаралы орталық мешіт жамағаты да ұйытқы болуда. Бүгінде көпшіліктің үлес қосуымен Орталық қалалық мешіт алдында азық-түлік пен бірінші қажеттіліктегі заттар жиналуда. Қайырымдылық акциясын ҚМДБ-ның Семей аймағы бойынша өкілдігі, «Зекет» қоры және еріктілер бірлесіп жүзеге асырмақ.
— Күнгейдегі Мақтаарал өңірінде су тасқыны болғанын жалпы ел біледі. Осыған байланысты жерлестеріміз зардап шеккендерге көмек көрсетпек. Біздің өңірде де қиындықтар болған кезде еліміздің барлық облыстары қол ұшын созған. ҚМДБ мен «Зекет» қоры зардап шеккендерге қаржылай көмек көрсету үшін аталмыш акцияны ұйымдастырып отыр. Оған қала еріктілері де атсалысып, азық-түлік пен киім-кешек жинауда. Біз барша семейліктерді мұқтаж жандарға көмек қолын созуға шақырамыз, — дейді ҚМДБ-ның Семей өңірі бойынша бас имамы Асқар Әбітайұлы.
Өңіріміздің бас діндарының айтуынша, 4-5 күн бойы мешіт алдында арнайы жүк көліктері тұратын болады. Оған қалалықтар жинап берген азық-түлік және басқа да күнделікті тұрмысқа қажетті заттар тиеледі. Көліктер жүкке толған сәтте Мақтааралға жіберіледі.
— Су тасқынынан зардап шеккендерге көмектесу үшін тез бұзылмайтын өнімдерді, яғни киім, жастық, көрпе және басқа қажетті заттарды әкелуге болады. Сондай-ақ кез келген соманы «Зекет» қорына 4400 4301 1208 7538 нөмірі арқылы жіберіп, қаржылық қолдау көрсете аласыздар, — дейді бас имам.
«СТ» — ақпарат{jcomments off}
