Эстониядағы іздеу жұмыс-тарының нәтижесінде табылған Абдулманат Таиповтың «Ерлігі үшін» медалі ардагердің туыстарына табыс етілді. Ұзақ уақыт бойы жатып қалған марапат Эстонияның «Otsing» әскери-тарихи клубы мен «LENPEH-PETERGOF» Санкт-Петербург іздеу тобының арқасында Қазақстанға жіберіліпті.
Ұлы Жеңістің 75 жылдығы қарсаңында аймақ басшысы Даниал Ахметов табылған медальді Абдулманат Таиповтың немере бауыры Ернар Мұратқазыұлына табыстады.
Таипов Абдулманат соғысқа Мақаншы ауданынан шақырылып, 282-шi атқыштар дивизиясы 3-ші ротасының бөлімше командирі болып қызмет етті. 1943 жылғы 6 маусымда болған шабуыл кезінде сержант бірінші болып жау траншеясына жетіп барып, гранатамен немістердің қорғаныс нүктелерін жойып, пулеметін тартып алады. Осы ерлігі үшін «Ерлігі үшін» медалімен марапатталған.
— Біз атамызбен мақтанамыз. Бүкіл отбасымызбен ол кісіні еске алып, ерлігіне тағзым етеміз. Есімін құрметтейміз. Жеңістің 75 жылдық мерекесінде бізге атамыздың медалі табысталғанына аса қуаныштымыз. Атамыз осы уақытқа дейін хабарсыз кеткендер қатарында болған еді. Енді оның 1944 жылы ұрыста қаза тапқанын біліп отырмыз. Біз бұл құнды жәдігерді сақтап, оны ұрпақтан-ұрпаққа жеткіземіз, — деді Ернар Мұратқазыұлы.
Айта кетейік, бүгінгі таңда басқа да сарбаздарды іздеу жұмыстары еріктілердің көмегімен жалғасуда. Жыл сайын майданда хабарсыз кеткен боздақтарымыздың ерліктері жайлы деректер табылып, тарихтың жаңа парақтары ашылуда. 2019 жылдың өзінде ғана Новгород облысында Шығыс Қазақстаннан шақырылған 16 жауынгердің сүйектері табылған болатын. Қазір олардың туыстары аталарының қайда жерленгенін біледі.
– «Естелік жолы» халықаралық жобасы аясында біздің облыста орналасқан эвакуациялық госпитальдарда қайтыс болған сарбаздардың заттары Мәскеудегі «Патриот» саябағының тарихи-мемориалдық кешеніне берілді.
Бүгін Абдулманат Таиповтың «Ерлігі үшін» медалі оның ұрпақтарына тапсырылып отыр. Сұрапыл соғыс кезінде миллиондаған жас сарбаздар майдан даласында қаза тауып, бізге бейбіт өмір сыйлады. Сіздерді Ұлы Жеңіс күнімен құттықтаймын! Баршаларыңызға тыныштық, бейбітшілік пен береке тілеймін, — деді Даниал Ахметов.
Мақпал МАРАТҚЫЗЫ, «Семей таңы»{jcomments off}
