Бородулиха ауданының шаруалары, COVID-19 пандемиясына қарамастан, күшейтілген режімде жұмыстарын жалғастыруда. Өңірде көктемгі дала жұмыстарына дайындық әлдеқашан басталып кеткен.
Бородулиха ауданында, мал шаруашылығымен қатар, өсімдік шаруашылығы да жақсы дамыған. Жыл басынан көктемгі дала жұмыстарына дайындық шаралары жүргізіліп, жұмыс жоспары жасалды, егіс алқаптары анықталды.
Аудандық ауыл шаруашылығы бөлімінің басшысы Марат Нұркешовтің мәліметінше, биылғы ауылшаруашылық дақылдарының егіс алқабы 324,9 мың гектар аумақты құрайды. Бұл 2019 жылмен салыстырғанда 5,9 мың гектарға артық. Оның ішінде жаздық егін 279 мың гектар алқапқа егіледі: 148,7 мың гектар жерге дәнді және бұршақты дақылдар, 44,58 мың гектар алқапқа мал азықтық дақылдарды себу жоспарланған.
— Ауданда егіс алқаптарын әртараптандыру, яғни дәстүрлі дақылдарды өнімділігі жоғары және сұранысқа сай дақылдарға алмастыру жұмыстары жүргізілуде. Сол себепті соя дақылдарын егу көлемі 6 есеге, дәнді жүгері алқабы 8 есеге, рапс 128 гектарға ұлғайтылады.
Жоспарланған егістік көлемін толық орындау үшін аудандағы ауылшаруашылық тауарын өндірушілер 22,5 мың тонна дәнді дақылдар мен 960 тонна майлы дақылдарды екті. Бүгінгі күні егілген тұқымның 96%-ы сынақтан өткізілді және сапасына сәйкес келетіні анықталды, — дейді Марат Нұркешов.
Сұрыптау және тұқымды жақсарту мақсатында фермалар қосымша жоғары репродукциялы тұқым сатып алмақ: шамамен 8,4 мың тонна тұқым алу жоспарланып отыр.
Көктемгі дала жұмыстарының барлық түрін жүзеге асыру үшін техника саны жеткілікті. Бұл жұмыстарды жүргізу үшін 997 бірлік шынжыр табанды және доңғалақты көлік құралдары тартылмақшы.
Марат Аждарұлының айтуынша, облыстық ауылшаруашылық басқармасының квотамен ауданға бөлген дизель отынының көлемі 5980 тоннаны құрайды. Дизель жеткізуші оператор — «Шығыс Мұнай Өнімдері» ЖШС. Наурыз — сәуір айларына дизель отынының бір литрінің бағасы 165 теңгені құрап отыр. 14 сәуірге дейін шаруа қожалықтары жоспарланған 1840 тонна минералды тыңайтқыштың 1284 тоннасына қол жеткізді.
Жадыра ТӨЛЕГЕНҚЫЗЫ{jcomments off}