Бородулиха ауданындағы 32 жалпы беретін мектепте 4971 оқушы білім алуда. Оқушылардың 2274-і компьютерлік техникамен, 2260-ы мобильді құрылғылармен қамтамасыз етілген. 437 балаға уақытша пайдалануға компьютерлік жабдықтар берілген.
Елдегі төтенше жағдайға байланысты аудандағы барлық білім ордалары қашықтықтан оқыту режіміне көшірілді. Ауданда 1501 оқушы білім беру платформалары арқылы, 3132 оқушы WhatsApp әлеуметтік желісі, компьютер, планшет, смартфон арқылы білім алуда. Интернетке қосылмаған алты ауылдық округтегі 338 оқушы тапсырмаларды қағаз тасымалдағыштар арқылы алып, мұғалімдермен мобильдік желі арқылы байланысып отыр.
— «Ел арна» және «Балапан» телеарналарында сабақтар кесте бойынша жүргізілуде. Бұл арналар көрсетілмейтін аудандағы Уба-Форпост, Сахновка, Пролетарка ауылдарында мұғалімдер өздері бейнесабақтар түсіріп, флеш-карта арқылы оқушыларға таратты. Аталған ауылдарда қазіргі күні 71 оқушы білім алуда. Аудан мектептеріндегі барлық 803 мұғалім интернетке қосылған, компьютерлік техникамен және мобильді құрылғылармен жабдықталған,- дейді аудандық білім бөлімінің басшысы Найра Кукшебаева.
Жалпы, ауданда қашықтықтан оқыту үш бағыт бойынша жүзеге асырылуда: Whatsapp, Telegramm, Skype, Instagram әлеуметтік желілері және бірыңғай Kundelik, Bilimland.kz, Daryn.online.kz (республикалық арналар арқылы) платформалары арқылы 4633 оқушы (93%), флэш-дискілер арқылы 338 оқушы (7%); Otau TV республикалық телеарналары арқылы («Балапан», «Ел арна» телеарналары) 4900 оқушы (98%) білім алып жатыр.
Бүгінгі таңда Kundelik жүйесінде 4633 қолданушы бар, кері байланыс Whatsapp желісі және электрондық пошта арқылы жүзеге асырылуда.
— Бородулиха аудандық білім бөлімінің әдістемелік кабинеті 2 оқу вебинарын, 3 онлайн конференция өткізді. Аудандағы 32 білім беру мекемесінде қашықтықтан оқытуға көшу туралы туындаған сұрақтарға жедел жауап беру үшін Call-орталықтар ұйымдастырылды, студенттер мен ата-аналарға жеке кеңестер беріледі. Call-орталықтар туралы ақпарат мектептер мен білім бөлімінің сайттарында орналастырылған. Осы аптада Call-орталық арқылы 12 қоңырау түсіп, бөлім мамандары кеңестер берді. Қашықтықтан оқытуды ұйымдастыруда туындаған барлық мәселелер шешілуде, — дейді білім бөлімі басшысы. Ауданның 25 мектебінде интернет жылдамдығы 4-8 Мбит/с, 7 мектепте 2-3 Мбит/с (Жернов, Пролетарская, Уба-Форпостовская, Успенская, Красноярск, Андроново, Боровлянское орта мектептерінде интернет жылдамдығы өте төмен).
Ауданның барлық білім мекемелері 420 литр мөлшерінде дезинфекциялық құралдармен (гипохлорит) қамтамасыз етілген.
Айтолқын САМАТОВА
