Өткен апта соңында облысымызға ҚР Премьер-министрі Асқар Мамин арнайы жұмыс сапарымен келіп, аймағымызда атқарылып жатқан бірқатар жұмыстармен, соның ішінде Абайдың 175 жылдығына дайындық барысымен танысты.
ҚР Премьер-министрі Асқар Мамин жұмыс сапары аясында Шығыс Қазақстан облысының көктемгі егіс жұмыстары мен энергетика, өнеркәсіп, тұрғын үй және әлеуметтік инфрақұрылым салаларындағы ірі жобалардың іске асырылу барысын тексерді.
Өскемен қаласында Премьер-министр ҚР-ның ірі машина жасау және металлургия кәсіпорындарына — Өскемен өнеркәсіптік арматура зауыты мен Өскемен титан-магний комбинатына барып, оларды одан әрі дамыту жоспарларымен танысты.
Үкімет басшысы Өскемен қаласының жаңа шағын ауданындағы «Нұрлы жер» мемлекеттік бағдарламасы аясында салынып жатқан әлеуметтік тұрғын үй құрылысын барып көрді. Мұнда жалпы ауданы 400 мың шаршы метрге жуық 48 үй салу жоспарланған.
А.Мамин облыстық балалар ауруханасына барып, реанимациялық және операциялық блоктардың жұмысымен, сонымен қатар COVID-19-бен ауырған науқастарды емдеу үшін иммундық плазма бөлу жөніндегі ғылыми жобамен танысты.
Мәртебелі мейман сонымен қатар Семей қаласының әлеуметтік-экономикалық дамуы бойынша атқарылып жатқан іс-шаралар қатарына қанығып, ұлы ақынның алдағы мерейтойына дайындықтар жүріп жатқан нысандардың барлығын аралап көрді.
Асқар Ұзақбайұлы алдымен шаһар орталығындағы Абай алаңында жүргізіліп жатқан ауқымды жөндеу жұмыстарымен танысты. Қазіргі таңда бұл аумақта құрылыс жұмыстары қызу қарқынмен жүргізілуде. Алдағы уақыттарда аталмыш алаңның келбеті толығымен өзгереді. Алдын ала әзірленген, пысықталған жоба бойынша бордюрлерді жаңарту, ойшылдың құрметіне арналған ескерткішті жарықтандыру шаралары қарастырылған. Сонымен қатар спорт және балалар алаңдары, автокөліктерге арналған тұрақ, субұрқақ салынады. Қазіргі таңда құрылыс жүргізіп жатқан мердігер компания «Фирма Азия» ЖШС басшылығы барлық жұмыстар шілде айына дейін толығымен аяқталатынын айтады.
Қаламыздағы бірегей орындардың бірі, аймағымыздағы іргелі мәдени мекеме Абай театрында да Абай Құнанбайұлының 175 жылдық мерейтойына дайындық жұмыстары жоғары деңгейде жүргізілуде. Жөндеу жұмыстарына қаражат өткен жылы бөлінген болатын. Қазіргі күні жұмыстардың негізгі бөлігі, атап айтсақ шатырдың жұмсақ шатырын, қасбетін және баспалдақтарды жөндеу және аталмыш аумақты толықтай абаттандыру жұмыстары кедергісіз атқарылып жатыр.
Жөндеу жұмыстарының сапалы атқарылуын облыс әкімі Даниал Ахметов, қалалық әкімдік, облыстық мәдениет басқармасы қатаң бақылауға алғанын да айта кету керек. Себебі Абайдың 175 жылдығына орай атқарылатын ең маңызды іс-шаралар Семей театрында өтеді.
Театрдың ішкі безендірілуі де өзгереді. Екінші қабаттың фойесі жаңа бейнеге еніп, көрермендер залы да жаңартылмақ. Абай мерейтойында театр әртістері жаңартылған, заманауи талаптарға сай сахнаға шығатын болады. Қазіргі уақытта жұмысшылар сахнаға жаңа жабынды төсеуде. Дайындық бөлмелерінде де, әкімшілік қанатында да жөндеу жұмыстары басталды.
— Семей қаласы Тәуелсіз Қазақстанның мәдени, рухани мұрасында, тарихында айрықша орын алады. Ел басшылығы қаланың әлеуметтік-экономикалық дамуына және тұрғындардың өмір сүру сапасын арттыруға ерекше көңіл бөліп отыр, — деп атап өткен Асқар Ұзақбайұлы қаланы дамыту бойынша жоспарланған барлық жобаларды уақтылы іске асыруды толықтай қамтамасыз етуді тапсырды.
Үкімет басшысы Асқар Мамин сонымен қатар қаламызда орын тепкен Абайдың «Жидебай — Бөрілі» мемлекеттік тарихи-мәдени және әдеби-мемориалдық қорық-мұражайына да барып, ондағы мерейтойға әзірлік жұмыстарына да қанықты.
Сонымен қатар ҚР Премьер-министрі аталмыш мұражайдың қызмет барысымен және жаңғырту жұмыстарымен танысты.
Асқар Мамин іссапары аясында сонымен қатар қаламыздағы Қарағайлы ықшам ауданында жүргізіліп жатқан жұмыстармен де танысып шықты. Бүгінгі күні шағын ауданда 25 000-нан астам адам тұрады. 720 оқушыға арналған физика-математика бағытындағы Назарбаев Зияткерлік мектебінің жаңа ғимараты орналасқан. Мемлекеттік-жекеменшік серіктестік аясында салынған320 орындық балабақша бар.
Іссапары барысында Асқар Мамин шағын ауданда салынып жатқан сегіз үйдің құрылыс жұмыстарымен танысты. Мұнда сондай-ақ үш мектеп, алты балабақша, мұз модулінің және оңалту орталығының құрылысы қарастырылған.
Премьер-министр Қарағайлы шағын ауданындағы бірегей спорт кешенінде болып, бұл қазақстандықтардың бос уақытын тиімді өткізуге арналған нысан екенін баса атап өтті. Спорт кешенінің құрылысы 2017 жылы басталған болатын. Ауқымды мәдени-спорттық шараларды өткізу жоспарланған үлкен зал бес мың орынға есептелген. Қасбетті қаптауға «желдетілетін қасбеттің»принципі бойынша алюминий панельдері қолданылған.
Барлық халықаралық стандарттар бойынша салынған кешен спорттың әр түрі бойынша жарыстар өткізуге мүмкіндік береді. Бассейн турнирлер, жүзу жаттығуларын, аквааэробика, су добы және суға секіру жарыстарын өткізуге, т.б. сауықтыру шараларына арналған. Спорт ғимаратының жалпы ауданы 33,8 мың шаршы метрді құрайды. Ірі кешеннің құрылысын отандық компания — «Фирма Азия»ЖШС жүзеге асырды. Жобаның жалпы құны — 26 миллиард теңге.
Үкімет басшысы Семей қаласына, Абай Құнанбаевтың 175 жылдығына арналған іс-шараларға алыс және жақын шетелдерден қонақтар көп келетінін, сондықтан да мерейтойлық шараларды лайықты деңгейде өткізу қажеттігін баса атап өтті.
{jcomments off}
Әлібек КЕМЕЛХАН, «Семей таңы»
