Биылғы жылдың басынан бері Аягөз ауданында «Жұмыспен қамтудың жол картасы — 2020» бағдарламасы аясында 68 жоба нәтижелі жүзеге асырылып жатыр. Бұл жобаларға республикалық бюджеттен жалпы сомасы 2 миллиард 411 миллион теңге қаражат бөлінген. Атқарылып жатқан жұмыстардың барлығы аудан әкімі Ділдабек Оразбаевтың қадағалауында тұр. Яғни жергілікті биліктің күш салуымен қолға алынған жобалар іркіліссіз жүзеге асырылуда.
Әсіресе аудандағы елді мекендерді абаттандыруға баса мән берілген. Қазір ауылдар мен аудан орталығында әлеуметтік нысандар күрделі жөндеуден өткізіліп, жолдар жөнделіп жатыр. Жарықтандыру, спорт нысандарын салу да назардан тыс қалмаған. Аудан тұрғындары өзекті мәселелердің шешім тауып жатқанына дән риза.
Бүгінгі таңда 40 мыңнан астам тұрғыны бар Аягөз қаласын тура ортасынан темір жол желісі бөліп жатқаны белгілі. Шаһардың тау жақ беткейіндегі бөлігінде 13 мыңнан астам тұрғын бар. Қаланың осы бөлігінде көптен бері шешілмей келген, қордаланып қалған мәселелер бар еді. Соңғы жылдары сол мәселелердің шешімі біртіндеп табылып келеді. Жақында асфальт жол салынып, ауыз су мәселесі шешілді. Осы аумақта болашақта жаңадан спорт модулі тұрғызылатын болады. Онда бірнеше үйірме жұмыс істеп, жас жеткіншектердің бос уақыттарын тиімді өткізулеріне жағдай жасалмақ. Аягөздіктер қазіргі күндері әлеуметтік түйткілдерді шешу жолдарын атқарушы билік өкілдерімен бірлесіп талқылайтын болған. Аудан әкімі Ділдабек Тәжібаев та мұнда арнайы келіп, тұрғындармен жиі жүздеседі.
Осыдан екі жыл бұрын Кіші Аягөз өзені тасығанда көпірлердің ескіргені әрі жетіспейтіні мәселе болып көтерілген еді. Халықтың өтінішінен кейін бұл жағдайға назар аударылып, аталған мәселе бірден шешімін тапты.
— Өткен күзде әкімшілікке барып өтінішімізді айтқанбыз, аудан басшылығы сол өтінішімізді қабыл алып, міне, жол салып берді, мың да бір рақмет! Бұған қоса автобус қатынасы да жанданып, көшелердегі шамдар іске қосылып, аумақ жарықтандырылды. Қаланың осы бөлігінде көбінесе теміржолшылар, дәрігерлер тұратындықтан, жұмыстан кеш қайтатын адамдар көп, — дейді еңбек ардагері Аманғазы Жақыпов.
Жоғарыда аталған жобалар аясында сәтті жүзеге асырылып жатқан жұмыстардың бірі қайта жаңғырту шаралары болып отыр. Мәселен, аудандағы білім беру мекемелері де «Жұмыспен қамтудың жол картасы» бағдарламасы есебінен қайта жаңартылуда. Атап айтсақ, 30 жылдан бері күрделі жөндеу көрмеген Аягөз қалалық қазақ гимназиясында да ауқымды жұмыстар атқарылып жатыр. Жөндеу жұмыстарына аталған бағдарлама аясында 30 миллион теңгеден артық қаражат бөлінген. Қазір білім ордасының басшылығы мердігер мекеменің жұмысын күнделікті бақылауға алған.
— Ұлттық бірыңғай тестілеуге дейін құрылысшылар жұмыстың 60%-ын жүзеге асырып үлгеруге тиіс. Бірақ Ұлттық бірыңғай тестілеу өтетін орындарда ешқандай кедергі болмайды. Тестілеу аяқталғаннан кейін жөндеу жұмыстары қайтадан жалғастырылатын болады. Биылғы оқу жылында ҰБТ нұсқауға сай ұйымдастырылады, санитарлық талаптарға сәйкес, 3 кезеңмен өтеді, әлеуметтік арақашықтық сақталады, — дейді бұл ретте Аягөз қалалық көпсалалы қазақ гимназиясының директоры Бейбіт Шомақов.
Білім ошағын жөндеуден өткізіп жатқан мердігер компания өкілдерінің айтуынша, қазіргі уақытта жұмыстардың 30 пайыздайы жоспарға сай аяқталған. Қалған 70%-ын шамамен бір-бір жарым айда аяқтау көзделуде. Мекемеде қазір он бес адам жұмыс істеуде, оның жетеуі Аягөз қаласының Жұмыспен қамту орталығынан жіберілген. Жалақылары орта есеппен 85 мың теңгені құрайды.
Қазіргі таңда аудандағы 12 мектепте күрделі жөндеу жұмыстары қарқынды жүргізіліп жатыр. Сонымен қатар орталық аурухана ғимараты да аталмыш мемлекеттік бағдарлама шеңберінде жөндеуден өтеді.
— «Жұмыспен қамтудың жол картасы — 2020» бағдарламасы аясында тек Аягөз қаласының өзіне ғана 1 миллиард 21 миллион теңге көлемінде қаражат бөлініп отыр. Бұл қаржы 25 нысанды күрделі және ағымдағы жөндеуден өткізуге жұмсалатын болады. Бүгінгі күні осы нысандарда жөндеу жұмыстарын жүргізетін мердігерлермен келісімшарттар жасалған. Мердігерлер қазіргі таңда жұмыстарын бастап кетті,- дейді Аягөз қаласының әкімі Қуаныш Азыханов.
Қорыта айтатын болсақ, «Жұмыспен қамтудың жол картасы» мемлекеттік бағдарламасы аясында аудандағы екі қолға бір күрек таппай жүрген азаматтар жұмыспен қамтылған. Аудан бойынша бүгінде бұл жобаларды жүзеге асыру үшін 700-ге жуық адам еңбекке тартылған. Осылайша, жергілікті атқарушы билік жұмыссыздық мәселесін мемлекеттік бағдарлама есебінен де шешіп отыр.
Қуаныш ЖОЛЫМБЕТ, «Семей таңы»{jcomments off}
