Бүгінгі таңда Аягөз ауданының әкімі, «Nur Otan» партиясы аудандық филиалының төрағасы Ділдабек Оразбаевтың тапсырмасымен жергілікті партия белсенділері тарапынан бірқатар шаралар өткізілуде. Көзделген мақсат аудан тұрғындарының әлеуметтік мәселелерін анықтап, олардың дер кезінде шешім табуына күш салу, сондай-ақ Аягөз қаласының абаттандырылуы мен тазалығын қадағалау болып отыр. Міне, осы орайда жергілікті белсенділер партиялық бақылау жұмыстарын біршама ширата түскен. Өткен аптада да осы бағыттағы жұмыстар кеңінен қолға алынды.
Апта ішінде «Nur Otan» партиясының Аягөз аудандық филиалы төрағасының бірінші орынбасары Кенжегүл Габдуллина, аудандық мәслихат хатшысы Сейілбек Ысқақов, қала әкімі Қуаныш Азыханов, сонымен қатар аудандық тұрғын үй-коммуналдық шаруашылығы, автомобиль жолдары, жолаушылар тасымалы, құрылыс және тұрғын үй инспекциясы бөлімі басшысының міндетін атқарушы Д.Ргаев және партиялық бақылау комиссиясының мүшелері «Сәуле», «Гимназия», орталық жылу қазандықтарының ағымдағы жөндеу жұмыстарымен танысып қайтты. Аталған нысандардың алдағы қысқа даярлығын тексерген комиссия мүшелері бірқатар мәселелерді өзара сарапқа салды.
Айта кетерлігі, аталмыш жылу орталықтарында өткен жылы аудан әкімі Ділдабек Оразбаевтың тапсырмасы бойынша біршама ауқымды жұмыстар атқарылған болатын. Соның нәтижесінде жұмыс режимінде жиі ауытқушылықтар орын алатын қазандықтар жұмысы жүйеленіп, қалалықтар қыс мезгілінде тоңбай шықты. Әйтсе де осыған дейінгі жүргізілген күрделі жөндеу жұмыстарына сеніп, тоқмейілсуге мүлде болмайды. Қатал қысқа қазірден бастап қамдану қажет.
Жөндеу жұмыстарымен танысу барысында әр нысан бойынша сметалық құжаттар қаралып, жауапты мердігерлерге тиісті ескертулер берілді.
Мемлекет басшысы Қасым-Жомарт Кемелұлы Тоқаевтың жергілікті билік өкілдері мен партия белсенділеріне халықпен ашық диалог құрып, тұрғындардың мұқтаждықтарына, өтініш-тілектеріне бірінші кезекте назар аудару туралы тапсырмасына орай, аталмыш бағыттағы жұмыстар алдағы уақыттарда да бірлескен түрде тығыз ымырашылдықпен жалғаса бермек.
Қ.НҰРБЕРГЕН{jcomments off}
