Семей қаласында Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған «Еңбек» мемлекеттік бағдарламасы сәтті жүзеге асуда.
«ШҚО Семей қаласы әкімдігінің халықты жұмыспен қамту орталығы» КММ директоры Сабыр Ашеловтің айтуынша, ағымдағы жылдың соңғы 4 айында Нәтижелі жұмыспен қамтуды және жаппай кәсіпкерлікті дамытудың 2017 – 2021 жылдарға арналған «Еңбек» мемлекеттік бағдарламасы аясында жұмыспен қамтудың белсенді шараларына 938 адам тартылған.
Бағдарламаға қатысушыларды техни-калық және кәсіптік біліммен қамтамасыз ету бағыты бойынша, 370 адамды нарықтағы сұранысқа ие мамандықтарға қысқа мерзімді кәсіптік оқыту жоспарлануда. Бұл бағытта 79 497 млн теңге бөлінген. Соның ішінде дәнекерлеуші, электр монтаждаушы, слесарь-сантехник, кран машинисі, өндірістік трактор жүргізушісі, кірпіш қалаушы, кең профильді станокшы, шаштараз, саяхаттау менеджері, маникюр шебері, тігінші, тәрбиешінің көмекшісі, массаж жасаушы, аспаз, кондитер, бухгалтер, 1 С білімімен ЭЕМ операторы және басқа да мамандықтарға басымдық беріліп отыр.
– Қазіргі күні осы мамандықтар бойынша жұмыс іздеушілерді және жұмыссыздарды оқытуға өтініштер қабылдануда. ШҚО «Атамекен» кәсіпкерлік палатасы оқыту орталықтарының, колледждердің тізімін және аймақтық комиссия оқытудың бағасын бекіткеннен кейін жұмысты бастамақшымыз,- дейді орталық директоры С.Ашелов.
«Еңбек» мемлекеттік бағдарламасының жаппай кәсіпкерлікті дамыту бағыты бойынша шағын несие алуға өтініш білдірушілерге 224,1 млн теңге сомасына 31 жолдама берілген.
– Оның ішінде екінші деңгейдегі банкттер арқылы 73,7 млн теңге сомасында 9 жолдама, «Ауыл шаруашылығын қаржылай қолдау қоры» АҚ арқылы 96,4 млн теңгеге 17 жолдама және кредиттік серіктестіктер арқылы 54,0 млн теңгеге 5 жолдама берілді. Жаңа бизнес-идеяларды ұсынушыларға 121,648 млн теңге мөлшерінде 218 мемлекеттік грант бөлінбек, – дейді орталық директоры.
«Халықты жұмыспен қамтуға жәр-демдесу және еңбек ресурстарының ұтқырлығы арқылы еңбек нарығын дамыту» атты бағдарламаның үшінші бағыты аясында 375 адам тұрақты жұмысқа, 131 адам уақытша әлеуметтік жұмысқа, 306 адам қоғамдық жұмысқа орналастырылған.
– Осы жылдың соңына дейін 305 адамды уақытша әлеуметтік жұмыс орындарына орналастыру жоспарланған. Бұл бағытта бөлінген 66 130 млн теңгенің 5,401 млн теңгесі игерілді. Соңғы төрт ай ішінде қоғамдық жұмыстарға 306 адам орналасты. Жылдық жоспар бойынша 1401 адамды қоғамдық жұмысқа тарту көзделіп отыр. 117 түлек «Жастар тәжірибесі» бағдарламасымен жұмысқа жолданды. Жыл соңына дейін аталмыш бағдарлама арқылы 512 жасты жолдама бойынша тиісті мекемелерге жіберетін боламыз, – дейді Сабыр Даярханұлы.
Еңбек ресурстарының ұтқырлығын арттыру мақсатында Семей қаласы бойынша 2020 жылы оралмандар мен қоныс аударушылар қатарындағы 45 адамнан тұратын 25 отбасыға квота берілген. Олардың ішінде 4 отбасы (4 адам) оралман және 21 отбасы (41 адам) оңтүстік өңірден қоныс аударушылар.
– Ағымдағы жылда қоныс аударушыларға 2, 505 млн теңге көлемінде (жылдық жоспар – 31 905 млн теңге.) субсидия, тұрғын үйді жалдауға және коммуналдық қызметтерді өтеуге 6,072 млн теңге (жылдық жоспар – 22 553 млн теңге) төленді,- дейді орталық директоры.
Бағдарламаның төртінші бағыты – «Жастар – ел тірегі» жалпыұлттық жобасының аясында, «100/200» қағидаты бойынша «Жас маман» жобасы шеңберінде еңбек нарығында сұранысқа ие мамандықтар бойынша білікті кадрларды даярлау, «Жас кәсіпкер» жобасы арқылы жастар кәсіпкерлігін дамыту шараларын жүзеге асыру жоспарлануда.
– Ағымдағы жылдың басынан атаулы әлеуметтік көмек алуға 2384 отбасыдан өтініш қабылданып, 108 отбасыға тағайындалудан бас тартылды. АӘК 2276 отбасыға (10466 адамға), оның ішінде 1680 отбасыға (8304 адам) шартты ақшалай көмек, 596 отбасыға (2162 адам) шартсыз ақшалай көмек, атаулы әлеуметтік көмек алушылар қатарынан 1886 отбасыға (2970 балаға) кепілдік берілген әлеуметтік топтама тағайындалды. Шартты ақшалай көмек алатын еңбекке жарамды отбасы мүшелерінен қоғамдық жұмыстарға 14 адам, уақытша әлеуметтік жұмыс орындарына 11 адам тартылса, 2 адам «Жастар тәжірбиесі» бағдарламасымен мекемелерге жіберіліп, 71 адам тұрақты жұмысқа орналастырылды. Барлығы 98 адам жұмыспен қамтуға жәрдемдесудің белсенді шараларына тартылды, – деді орталық директоры.
Жұмыс істеуге ниеті бар адамға екі қолға бір күрек табылады. Мемлекет тарапынан да қыруар қаржы бөлініп, сұранысқа ие мамандықтарға тегін оқытуға, кәсіп бастауға, азаматтарды әлеуметтік және қоғамдық жұмыстарға тартуға айтарлықтай қолдау көрсетілуде.
Жадыра ТӨЛЕГЕНҚЫЗЫ, «Семей таңы»{jcomments off}
