Кеше, 2 шілде күні облыс әкімі Даниал Ахметов қала және аудан әкімдерінің, басқарма басшыларының қатысуымен коронавирус инфекциясының таралуын тежеу бойынша жиын өткізді.
Ел Президенті Қасым-Жомарт Тоқаев инфекциялық, провизорлық және карантиндік стационарлардағы төсек-орын санын 50%-ға арттыруды тапсырған болатын. Осыған орай аймақта аталған санаттағы төсек-орындар саны 400%-ға артты.
Бүгінде облыста 1700 инфекциялық және 2500 карантиндік орын әзір. Барлық қалалық және аудандық ауруханаларда қарқынды терапия палаталары дайындалып, диагностика мен зерттеулердің бірыңғай алгоритмі әзірленді. Қалалар мен аудандар әкімдерінің және медициналық мекемелердің бас дәрігерлері арасындағы іс-қимыл жүйесі жолға қойылды.
COVID-19 вирусына шалдыққан науқастарды тиімді емдеу үшін тиісті шаралар қабылдануда. Бүгінде облыста 50 рентген аппараты, 196 ИВЛ (өкпені жасанды желдету) аппараты бар және қосымша тағы осындай 50 аппарат сатылып алынбақ.
— Бүгінде облыста 15 компьютерлік томограф бар, бұл нормадан 2 есе көп. Бұдан басқа, пандемия жағдайындағы іс-қимыл жоспарына сәйкес, компьютерлік томографияның әрбір аппараты белгілі бір ауданға бекітілген. Қазіргі уақытта медициналық техника жеткілікті, қосымша төсек жанындағы мониторларды, балалар ӨЖЖ және басқа да техниканы сатып алу мәселесі қарастырылуда. Барлық дәрігерлер жүз пайызға жеке қорғану құралдарымен қамтамасыз етілген. Сонымен қатар тамыз айында ең заманауи талаптарға сәйкес жабдықталған 100 жедел жәрдем машинасын сатып алу жоспары бекітілген, — деп жазды Даниал Ахметов инстаграм әлеуметтік желісіндегі жазбасында.
Өкінішке орай, облысымызда тек маусым айында коронавируспен ауыратын науқастар саны 135-тен 710 адамға дейін күрт өскен. Жиын барысында аймақта шектеу шараларын қайта енгізу мәселесі талқыланды.
— Тәжірибе көрсеткендей, коронавирус инфекциясының таралуын тек осылай тоқтатуға болады. Аймақ ішінде жүру тыйылады. Демалыс күндеріне толық шектеу жарияланады. Айта кетейін, біз бизнестің жұмыс істеп, тұрғындардың жалақы алуы үшін қолдан келгеннің бәрін жасаймыз. Сондықтан, құрметті жерлестер, сіздерден өзіңіздің және жақ{jcomments off}ындарыңыздың денсаулығын сақтауды сұраймын, — деп жазды аймақ басшысы Даниал Ахметов.
Жадыра ТӨЛЕГЕНҚЫЗЫ, «Семей таңы»
