Қазіргідей күрделі жағдайда халқымыз жұдырықтай жұмылып, бірлігін көрсетіп келеді. Індеттің екінші толқыны басталғалы бері республикамыз бойынша қайырымдылық акциялары кең көлемде етек алып, халық қолдан келгенше көмек беруде. Семей қаласының белсенді азаматтары да тыс қалған жоқ. Қайырымдылық қорын ашып, қаладағы ауруханаларды өкпені жасанды желдету аппараттарымен қамтамасыз етуге кірісті.
Белсенді топтың ұйымдастыруымен жуырда ғана Семей қаласында «Халық көмек» атты қайырымдылық акциясы бастау алды. Аз уақыт ішінде қордағы есепшотқа 27 млн теңгеден астам қаржы жиналып, алғашқы 65 өкпені жасанды желдету аппараты қаладағы жұқпалы аурулар ауруханасына, «Хакім» емханасына, хосписке, туберкулез диспансеріне, перинаталдық орталыққа және өзге де емханаларға тапсырылды.
– Қазіргі күні бұл аппарат өте қажет. Ауыр жағдайдағы нәрестелер мен аналардың өмірін сақтап қалуға көмектеседі. Қолдау көрсеткен барша қала тұрғындарына алғысымызды білдіреміз,- дейді қаладағы Перинаталдық орталықтың бөлім меңгерушісі Ермек Баймұхаметов.
– Бұл аппараттарға пульманологиялық бөлімдегі жан сақтау және интенсивті терапия бөлімінде жатқан науқастар аса зәру болып отыр. Қайырымды жандарға алғыс білдіреміз,- дейді туберкулезге қарсы күрес диспансерінің бас дәрігері Ерлан Шәкенов.
Алдағы уақытта Мәскеуден тағы 150 құрылғы жеткізілмек. Айта кету керек, аппараттардың барлығы зауыттан биылғы жылы шыққан. Үш жыл сапа кепілдігі бар. Жалпы қызмет ету мерзімі он жылдан кем емес. Бір оттегі аппаратының құны 420 мың теңгені құрап отыр.
– Жасанды желдету аппараттарымен қоса, дәрі-дәрмектерді, қорғаныш киімдерін ауруханаларға тегін таратудамыз. Біздің ең басты байлығымыз – адам және адамның өмірі. Осындай сын сағатта халыққа қызмет етіп, көмек көрсету – туған ел алдындағы перзенттік парызымыз. Акцияға атсалысқан барша азаматқа ризашылығымызды білдіреміз. Көмек көрсетуді әлі де жалғастыра береміз, – дейді қала тұрғыны Дәурен Кульчигишев.
Қазір әлемде коронавирусқа шалдыққан науқастарды емдеудің түрлі тәсілдері зерттелуде. Солардың бірі COVID-19 вирусынан емделгендердің қанынан жасалатын иммунды плазманы ауырған адамдарға құю әдісі. Шет елдерде оң нәтиже көрсеткен тәжірибе елімізде де қолданыла бастады. Қазір Семей қаласындағы қан орталығы донорларды қабылдау үстінде. Дәрігер-трансфузиолог Ботагөз Қалибекованың айтуынша, донор болатын адамның COVID-19 вирусынан айыққанына кем дегенде он төрт күн өтуі және қан құрамында белгілі мөлшерде антиденелер болуы қажет. Сонымен қатар ВИЧ, геппатит, ПТР анализдерінің қорытындысы тексеріледі. Қан тапсырған адамдарға жеті айлық есептік көрсеткіш, яғни 19 446 теңге көлемінде төлем төленеді. Қажет болған жағдайда донар болуға ниетті адамдарды орталықтың қызметтік көлігі тасымалдауға әзір.
– COVID-тан жазылып шыққан қала тұрғындарын донор болуға шақырамыз. Қан тапсыру арқылы өзге науқастардың ауруынан жазылып шығуына мүмкіндік сыйлауға болады. Сондықтан бұл мәселеге бейжай қарамай, белсенді болғанымыз жөн. Індетпен күресуге әрбіріміз жауапкершілік танытуымыз қажет. Біз үшін әрбір адамның өмірі маңызды,- дейді Ботагөз Қалибекова.
Құрметті оқырман, «Халық көмек» акциясына атсалысқыңыз келсе, Kaspi.kz қосымшасы арқылы көрсетілген есепшотқа қаржы аудара аласыз. Kaspi Gold: 5169 4971 3514 2598. ЖСН: 5406 0940 01 88 немесе 8 701 472 15 77 телефон нөмірі арқылы аударым жасауға болады.
Жадыра ТӨЛЕГЕНҚЫЗЫ, «Семей таңы»{jcomments off}
