Шілде айының 1-нен бастап Семей қаласындағы «Тұрғын үй құрылыс жинақ банкі» АҚ филиалында «Жас отбасы» бағдарламасы іске қосылды. «Жас отбасы» депозитін семейліктер банк бөлімшесі немесе кеңес беру орталықтары арқылы аша алады.
Жаңа бағдарламаның ерекшелігі — заңды некелері 3 жылға толмаған жас отбасылар жылдық 6%-дық мөлшерлемемен баспаналы бола алады. Несиені өтеу мерзімі — 6 жылдан 9 жылға дейін. Аталмыш бағдарламамен үй рәсімдеу үшін ерлі-зайыптылардың біреуі (немесе екеуі де) Тұрғын үй құрылыс жинақ банкінде жаңа депозит ашып, кемінде 1 жыл бойы қаражат жинауы керек. Жинақтау мерзімі өткенде бағалау көрсеткіші (ОП) 5 ұпайдан кем болмауы тиіс.
— Несиелік өтінім берерде депозитке тұрғын үй бағасының 50%-ын жинау немесе бірден салу қажет болады. Депозитті некеге тұрған сәттен бастап үш жылдың ішінде ашу керек. Қазір карантин кезіңде банкте көшпелі қызмет іске асырылуда. Яғни кеңесшіні үйіңізге немесе жұмысыңызға шақырып, депозит ашуға болады. Айта кету керек, 9 шілден 31 шілдеге дейін кеңес беру орталықтарында немесе кеңесшілерді шақыртып «Жас отбасы» депозитін ашқан азаматтарға акция жүргізілуде. Айдың аяғына дейін депозит ашқандарға кепілдендірілген сыйлық бар. Кеңес беру орталықтардың мекенжайлары және кеңесшілердің байланыс телефондары @zhilstroy_semey Instgram парақшасында көрсетілген,- дейді «Тұрғын үй құрылыс жинақ банкі» АҚ Семей қалалық филиалы кеңесшісі Салтанат Кустанова.
Несиені жаңа үйден пәтер немесе жер үйді сатып алу, қолданыстағы үйден пәтер немесе үй сатып алу, тұрғын үйге жөндеу жұмыстарын жүргізу, жеке тұрғын үй құрылысы немесе жер телімін сатып алу мақсатында алуға болады. Жас жұбайлардың жас мөлшеріне шектеу қойылмайды.
— Екі жыл өткен соң, тұрғын үй заемына ауысқан кезде, мөлшерлеме жылдық 5%-ға дейін төмендейді. Депозитті ерлі-зайыптылардың екеуі де ашып, отбасылық пакетке біріктірсе, екі еселенген мемлекет сыйлық ақысын алу мүмкіндігіне ие болады. «Жас отбасы» бағдарламасы аясында отбасылық пакеттің құрамына тек ерлі-зайыптылар қосыла алады,- дейді Салтанат Кустанова.
ҚР Президенті Қасым-Жомарт Тоқаевтың 2020 жылдың 11 мамырында берген тапсырмасы аясында Тұрғын үй құрылыс жинақ банкі сонымен қатар «Нұрлы жер» бағдарламасының «5-10-20» атты жаңа пилоттық бағытын әзірлеуде. Бұл жоба Семей қаласында әзірге басталған жоқ.
Жаңа пилоттық жоба «5-10-20» шарты бойынша тұрғын үй сатып алу үшін азаматтарды несиелендіруді қарастырады: несие мөлшерлемесі 5%, бастапқы жарна 10%-дан бастап, несиелендіру мерзімі 20 жылға дейін. Бағдарламаға тұрғын үйге мұқтаж ретінде жергілікті атқарушы органдарда есепте тұрған азаматтар қатыса алады. Баспананы «Нұрлы жер» бағдарламасының аясында салынған жаңа тұрғын үй кешендерінен де, жеке құрылыс салушылардан да сатып алуға болады.
— Қазір жобаның шарттары талқыланып жатыр. Нұр-Сұлтан, Алматы және осы қалалардың маңындағы аймақтар үшін тұрғын үй бағасы 18 млн теңгеден, Атырау, Ақтау, Ақтөбе, Түркістан және Қарағанды облыстары, сондай-ақ Шымкент қаласы үшін 15 млн теңгеден, басқа аймақтар үшін 12 млн теңгеден аспайды.
— Азаматтардың төлем қабілеттілігі ескеріледі. Әрбір отбасы мүшесіне шаққанда бір күнкөріс минимумынан төмен табыс табатын отбасылар үшін сатып алу құқығынсыз үйді жалға алу мүмкіндігі ұсынылса, 2 күнкөріс минимумына дейін табысқа ие баспанасыз отбасылар (көп балалы, толық емес және мүмкіндігі шектеулі балаларды асырап отырған отбасылар) «Бақытты отбасы» бағдарламасына, ал 3,1 күнкөріс минимумына дейін табысқа ие баспанасыз отбасылар «5-10-20» пилоттық жобасына қатыса алады, — деді С.Кустанова.
Сонымен қатар биыл облысымыздағы 11 аудан орталығында 277 пәтерлі 141 үй салынбақ. Үйлердің жалпы ауданы 25 мың шаршы метрді құрамақ. Жоба құны — 3,5 млрд теңге. Бұл туралы облыс әкімі Даниал Ахметов инстаграм әлеуметтік желісіндегі парақшасында:
— Қазіргі уақытта жер телімдері бөлінді. Барлық үйлер қолданыстағы магистраль желілерінен электр және сумен қамтамасыз етіледі. Зайсан, Күршім және Тарбағатай аудандарының әкімдіктері құрылыс салушылармен меморандумға қол қойды,- деп жазды.
Аймағымызда сондай-ақ «Бірқабатты ШЫҒЫС» деген шартты атаумен жаңа тұрғын үй бағдарламасы да әзірленуде.
Жадыра ТӨЛЕГЕНҚЫЗЫ, «Семей таңы»{jcomments off}
