Бүгінгі күннің батырлары ретінде коронавирус індетімен күресте алғы шепте жүрген дәрігерлер қауымын атауға болар. Жеке басынан қызметті, қоғам игілігі үшін атқарылар шараларды жоғары қойып, қауіп-қатерге қарамастан тәуекелге бас тігіп жүрген медицина саласының өкілдеріне қазіргі таңда қандай мақтау айтсақ та жарасады. Осындай ерлікке барған, вируспен күресте апталап, тіпті айлап отбасынан жырақта еңбек етіп жүрген ақ желеңді абзал жандар біздің өңірімізде де баршылық. Солардың ішінде Семей қаласының Жедел медициналық жәрдем ауруханасы дәрігерлерін айрықша атауға болады. Осы ретте аталмыш емдеу мекемесінің вируспен күрестегі бүгінгі қызметі жайында сөз етпекпіз.
Іргелі мекеменің бас дәрігері Ерлан Бүркітовтің айтуынша, Семей қаласының Жедел медициналық жәрдем ауруханасында шілде айының 6-шы жұлдызында провизорлық стационар ашылған. Соған сәйкес және де еліміз бойынша күшейтілген карантин жағдайында аурухана қызметі күшейтілген режимге көшірілген. Қазіргі күні мұнда тәртіп қатаң. Залалсыздандыру жұмыстарының ұдайы жүргізілуімен қатар, бөгде адамдар үшін елеулі шектеулер қойылған.
— Қызметкерлеріміздің барлығы дерлік медициналық құрал-жабдықтармен толықтай қамтылған. Олар үшін жұмыс барысында арнайы қорғаныш киімдерін киіп жүру қазіргі таңда міндетті болып табылады. Ұзақ уақыт мұндай киіммен жүру қолайсыз әрі оңай емес. Әйтсе де әріптестеріміз сабыр сақтап, барлық жағдайға байыппен қарауда. Себебі қазіргі күні олардың өздерінің де денсаулықтарын сақтау аса маңызды, — дейді бұл ретте бас дәрігер Ерлан Төлеуғазыұлы.
Бүгінде аталмыш ауруханада 300 төсектік провизорлық стационар ашылған. Оның 30 төсегі инфекциялық стационарға жатады. Жалпы, провизорлық орталықтың өз реанимациясы бар. Заманауи медициналық құрал-жабдықтармен қамтылған қаладағы ең үлкен аурухана болғандықтан, әрі қажетті мамандар қызмет атқаратындықтан, мұнда жағдайы аса ауыр науқастар қабылданады екен. Ауруханадағы жансақтау бөлімі жоғары деңгейде жабдықталған. Гибридті ота жасаудан бастап, компьютерлік томография, магнитті-резонасты томограф та бар. Әрі бұл құрылғылардың барлығы да жаңа. Мұндағы дәрігерлер шет елдерде білімдерін жетілдіріп отырады, барлығы да өз істерінің нағыз шеберлері. Яғни, ана дүниенің табалдырығында тұрған науқасты бері қайтарып алуға барлық мүмкіндіктері бар. Сол себепті Семей қаласының Жедел медициналық жәрдем ауруханасынан провизорлық стационар ашу облыс басшылығы тарапынан толықтай құпталған екен.
Бүгінде провизорлық стационарда 115 сырқат ем алуда. Инфекциялық ауруханада 15 науқас және профильді ауруханада 140 адам ем қабылдап жатыр. Бір ерекшелігі — мекемеде профильді көмек те көрсетілуде. Яғни жүрек-қан тамыр сынды сырқаты барлар осында келіп ем қабылдауда.
— Қазіргі күндері жұмысымыз біршама жеңілдегендей сезіледі. Алғашқыда стационарға келіп түсушілердің қатары өте көп болған еді. Жедел жәрдемді күтпей, жеке көліктермен келген сырқаттар саны да мол болды. Мұндай күрделі жұмыс дәрігерлерімізге айтарлықтай ауырлық түсіргені рас. Әйтсе де, қазіргі таңда сырқаттанушылардың саны азайғандықтан, бұрынғыдай емес, қалыпты арнаға түстік, — дейді бас дәрігер Ерлан Бүркітов.
Жуырда аталмыш ауруханаға Татарстанның Қазан қаласынан келген 12 дәрігер арнайы келіп, тәжірибе алмасыпты. Сонымен қатар, коронавирусты емдеу бойынша өз әдіс-тәсілдерімен де бөлісіпті. Аухана қызметімен таныса келе жоғары баға беріп, тіпті таңғалыстарын да жасыра алмапты. Шығыста дәл осындай жабдықталған аурухана бар деп ойламағандарын да жеткізіпті.
Қазіргі күні әсіресе «қызыл аймақта» еңбек ететін дәрігерлерге айрықша көңіл бөлінуде. Онда бір ауысымда бес дәрігер, 20 мейірбике және 10 интерн жұмыс істейді.
— Жалпы, халқымыздың жұқпалы аурудан сақтану туралы түсінігін, ниетін қалыптастыру керек. Карантин шектеулері енгізілді ме, ол бұлжымай орындалуы тиіс. Әсіресе той-томалақ, ас беру сынды жиындарды тоқтата тұрған дұрыс. Коронавирус сырқатын егде жастағы адамдар мен қосымша аурулары бар жандар өте ауыр өткереді. Сондықтан әсіресе жасы үлкен кісілерге үйде отырған дұрыс дер едім. Бұл ретте барша қауымды өздерінің және жақындарының денсаулықтары, қауіпсіздіктері үшін сақтық шараларын күшейтіп, оқшаулануға, әлеуметтік арақашықтықты сақтауға мән беруге шақырамын, — дейді өз сөзінде аурухананың бас дәрігері.
Осы орайда айта кетер бір жайт бар. Республикалық «Біз біргеміз!» акциясы аясында Семей қаласының Жедел медициналық жәрдем ауруханасының дәрігерлер қауымы мен қатерлі вирустан емделушілер үшін көптеген мекемелер мен еріктілер қайырымдылық шараларын ұйымдастырып жатыр. Соның ішінде «Фирма Азия» ЖШС басшысы Сәуле Досқожанованың көрсетіп отырған көмегін айтпай кетуге болмайды. Алғашқы болып көмек қолын созған кәсіпкер аурухана есепшотына 30 млн теңге көлемінде қаржы аударыпты.
Сонымен қатар «DAEWOO BUS KAZAKHSTAN» және «СемАЗ» ЖШС да қолдау білдіріп, миллион теңгенің үстінде қаражат бөліпті. Ал «БанкЦентркредит» мекемесі 2 млн теңге қаржы аударған.
Сол тәрізді осы өңірде туып-өскен кәсіпкерлер Семейден жырақта жүрсе де аталған акцияға елеулі түрде атсалысуда. Атап айтсақ, «ПрофСтройИнжиниринг» ЖШС аурухана қызметкерлерінің игілігі үшін 2 млн теңге бөліпті.
Қазіргідей қысылтаяң шақта дәрігерлер қауымына Семей қалалық әкімдігі тарапынан да айрықша қолдау көрсетілуде. Вируспен күресте алғы шепте жүрген, нақтырақ айтсақ «қызыл аймақта» қызмет көрсетуші медицина мамандарына аты жаман сырқатты жақындарына жұқтырмас үшін үйлеріне баруға болмайды. Сондықтан қалалық әкімдік олар үшін арнайы жатақхана бөлген. Қазіргі таңда онда жүзге тарта медицина қызметкерлері тұрып жатыр. Ал олардың үш мезгіл ыстық тамағын, ас-суын тағы да жергілікті кәсіпкерлер қауымы көтеріп алып отыр. Қаламыздағы «Кең сарай» мейрамханасы ұжымы бұл ретте бірінші болып көмекке келіпті. Дәрігерлерді тегін тамақтандырып, ас-ауқатпен тұрақты түрде қамтып отыр.
Сонымен қатар қалалық таксопарк басшысы Асқар Маратұлы Ширяевтың бастамасымен дәрігерлер үшін арнайы көліктер бөлінген. Олар медицина қызметкерлерін жұмысқа алып келіп, қайтарда апарып отыр. Бұл айтарлықтай үлкен көмек, қаланың төрт бағытына қатынайтын осы көліктердің есебінен дәрігерлердің жұмысқа келіп-қайтуы жеңілдеп отыр.
Аталмыш ауруханаға жәрдем жасаудан жеке кәсіпкерлер де тыс қалмауда. Серікжан Шәкенов сынды азамат 405 литр болатын әр түрлі сусындар әкеліпті. Сол тәрізді Абай ауданына қарасты Саржал ауылының тұрғындары бірлесіп дәрігерлер мен науқастар үшін «Өмірге үміт сыйла» акциясы аясында 500 литр қазақтың ұлттық сусыны — қымыз алып келіпті. Ал Қазақстан мұсылмандары діни басқармасының Семей аймағы бойынша бас имамы Асқар Мұқановтың жетекшілігімен үлкен тайқазанға палау әзірленіп, түскі ас беріліпті.
Қаладағы «Фастфуд» фирмасы да аталмыш аурухана қызметкерлері үшін ыстық тамақ дайындапты. Қайырымдылық шараларынан тіпті жергілікті дәрігерлердің өздері де шет қалмаған екен. Бас дәрігер Ерлан Төлеуғазыұлының айтуынша, қаламыздағы №17 отбасылық дәрігерлік амбулатория қызметкерлері төсек тартып жатқан, тамақ іше алмайтын ауыр науқастар үшін зондты тамақтандыру құрылғысының 17 қорабын табыс етіпті. Ал шаһардағы іргелі әрі үлкен ұжым — облыстық аурухана дәрігерлері жиналып, әріптестеріне түскі және кешкі ас әзірлеп әкеліпті.
Қаламыздағы «Керемет» мейрамханасы ұжымы медицина қызметкерлеріне бес күн бойы түскі ас пен кешкі тамақ дайындап әкеліпті. Шаһардағы іргелі мекемелердің бірі «Дизайн мебель» компаниясы да дәрігерлер мен науқастарға түскі ас дайындап беріпті.
Сол сияқты «Эйкос» фирмасының береке-бірлігі мығым ұжымы да ауруханаға түрлі сусындар әкеліп табыстапты.
Мұның барлығын неге айтып отырмыз? «Ас — адамның арқауы» демекші, вируспен күресте алғы шепте жүрген медицина мамандары мен науқастарға иммунитеттерін күшейту үшін ұдайы түрде құнарлы тамақ ішу қажет. Ал індетпен күресіп жүрген дәрігерлер қауымына қоғамдық тамақтану орнына баруға болмайтыны тағы да белгілі. «Жақсы ас тұрған жерде жаман ауру тұрмайды» деп қазақ нақылында айтылғандай, демеушілер көрсетіп жатқан бұл қолдау шаралары өз нәтижесін берері анық.
— Осындай күрделі кезеңде дәрігерлерімізге демеу болып, қайырымдылық шараларын ұйымдастырған, қолдау көрсеткен барша жанашыр азаматтарға ұжымымыздың, ауруханамыздағы медицина мамандарының атынан зор алғыс білдіргім келеді. Барлығына ризашылығымызды білдіре отырып, зор денсаулық, бақыт пен еңбектеріне табыстар тілейміз, — дейді бас дәрігер Ерлан Төлеуғазыұлы.
Әлібек КЕМЕЛХАН, «Семей таңы»{jcomments off}
