Ана атану, бала тәрбиелеу әрбір нәзік жан иелерінің арманы екені анық. Ал, олардың өмірге сәби әкелуі ерлік деуге де болар. Елбасының Жарлығына сәйкес, 8 Наурыз – Халықаралық әйелдер күні мерекесі қарсаңында «көп балалы ана» атанған ерекше ерлік иелері алтын және күміс алқамен марапатталды.
Қалалық әкімдікте өткен аналарды марапаттау шарасына қала басшысының орынбасары Зәуреш Исабаева мен қалалық ардагерлер кеңесінің төрағасы Амантай Доғалақов қатысып, Нұргүл Жексембинова, Саягүл Құрманғожина, Гаухар Лекерова, Динара Макарова және Кенжегүл Саяқованы күміс, ал, Әлфия Юсупова мен Жанар Өміртаеваны Алтын алқамен марапаттады.
Марапаттау барысында Алтын алқа иегерлерінің бірі – Жанар Өміртаевамен тілдесудің реті келген еді. 39 жастағы Жанар Сағадатқызы 7 баланың анасы. Тұңғышы 16-да болса, кенжелері Динара мен Диляра 1 жастан асқан. Балаларының бесеуі мектепте. Үлкен қызы Назерке 9 сыныпта оқиды, ал, жалғыз ұлы Аман 5 сынып оқушысы. Жұбайы Дәулет Аманғалиұлымен отасқандарына 17 жыл болған. 22 жасында тұрмыс құрған Жанар Сағадатқызы 23 жасында бірінші сәбиін дүниеге әкеліпті. Көп балалы ана әлі де өмірге бала әкелуге дайын екендігін айтады. Көп балалы әке – Дәулет Өміртаев та әкімдіктегі марапаттау шарасына жарымен және балаларымен бірге келген. Қаладағы мемлекеттік мекемелердің бірінде қызмет атқаратын Дәулет Аманғалиұлы:
{jcomments on}- Өзім де көп балалы отбасынанмын. Үйде 11 баланың тоғызыншысы, ал, ұлдың алтыншысымын. Анам Дәметкен Самбайқызы да «алтын алқа» иегері, — дей келе, — әр баланың орыны әр бөлек. Жұ-мыстан келгенде балаларымды иіскесем, шаршағаным бірден басылады, — дейді.
Мемлекет тарапынан тиісті көмек көрсетілетінін тілге тиек еткен мейірбан әке балаларының көп болуы Алланың берген сыйы деп түсінеді. Айтуынша, жеке меншік баспанасын өткен жылы өз күшімен салған. Оқу бітіріп, мамандық алса да ұрпағына ұлағатты тәрбие беру үшін балаларының анасын алақанда аялап, жұ-мысқа шығармаған. Отбасының қамы үшін бір өзі жанталаса еңбек етіп келеді.
Алқалы аналарға енді ай сайын 10 мың теңгеден аса жәрдемақы тұрақты түрде төленіп тұратындығын, сонымен қатар, 8 Наурыз – Халықаралық Әйелдер күні мен 1 маусым – балаларды қорғау күні мерекелерінде сый – сыяпат жасалып тұратындығын Зәуреш Рамазанқызы жеткізді.
— Нәзік жандылардың өмірге бала әкелуінің өзі – ерлік. Ал, көп бала әкелуі ол – батырлық және үлкен бақыт деп білемін. Міне, сіздер сол үлкен бақыттың иесісіздер. Сонымен қатар, бізді қуантатыны батыр аналарымыздың көбісі – жас аналар екендігі. «Бір қозы артық туса, бір түп жусан артық өседі» дегендей әрбір баланың өз несібесі болады. Сондықтан, әлі де балаларыңыздың саны арта берсін. Еліміздің демографиялық өсіміне үлес қосып отырған сіздердің жолдарыңызды соңдарыңыздан ерген сіңілілеріңізге, қыздарыңызға берсін! Әр шаңырақта тек қана жақсылық болсын!- деп барша аналарды төл мерекелерімен құттықтады.
Сөз алған қалалық ардагерлер кеңесінің төрағасы Амантай Доғалақов өмірге бала әкелумен бірге, тағылымды тәрбие беру де үлкен міндет екенін тілге тиек етіп, алқалы аналарға жылы лебізін білдірді.
Шара барысында марапат иелері де осындай жағдай жасалып отырғаны үшін және зор ілтипат білдіргендері үшін Үкіметке және қалалық әкімдікке алғыстарын айтты.
Нұрдәулет КӘКІШЕВ,
«Семей таңы»
