«Нұр Отан» партиясының Семей қалалық филиалында азаматтарды жеке мәселелері бойынша кезекті қабылдау өтті. Бұл жолы Семей қалалық ІІБ-нің басшысы Жұмабек Исадилов азаматтардың жеке сұрақтары бойынша қабылдау жүргізіп, құқыққорғау саласы бойынша тұрғындардың арыз – шағымдарын қарады. Қабылдауға Әуезов, Орталық, Затон полиция бөлімшелерінің басшылары мен «Нұр Отан» партиясының қоғамдық қабылдау бөлімінің меңгерушісі Дархан Жұмаділов қатысты.
Арыз-шағымын айта келген Рабиға есімді қарт ана өмір бойы өзі тұрған пәтерін келесі айдан бастап босатуға мәжбүр. Сөзіне сүйенсек, күйеу баласы пәтерді өзі сатып алғандығы жөнінде жалған құжат жасаған. Ендігі ретте үйдің бұрынғы иесі, енесінен пәтерді босатуын талап етіп отыр екен. Қартайған шағында барар жер, басар тауы қалмаған әже бұл істің анық-қанығына жетіп, әділеттілік іздеп, «Нұр Отан» партиясының қоғамдық қабылдауына арнайы келген. Жұмабек Исадилов арызды қабылдап, бұл істің ақ-қарасы анықталатындығын айтты.
Ал, Жанар есімді жанның жағдайы бір бөлек. Аякөзден балаларының соңынан келген ана үйде қарап отырмайын деп, қаражат табу қамымен бір жатақханаға еден жуушы болып орналасады. Алғашында мерзімді жалақы төленетінін айтқан ПИК басшысы соңынан сөзінен тайып, әр бөлмеге барып ақшаңды өзің жинап ал деген сыңай танытқан. Оған да көнген еден жуушы бөлмелерді аралап, бергендерден ақша, басқаларынан тұрмыстық заттар, азық-түлік алған. Бес айға жуық жұмыс істеп, мардымды жалақы ала алмаған жан соңғы рет пәтерлерді аралап, еңбегінің ақысын сұраса, бір пәтер иесі балағаттап, қол жұмсап, күш көрсеткен. Ал ПИК басшысы болса, өзін мазаламауын өтінген. Ашынған ана ақыры «Нұр Отан» партиясының көмегіне жүгінген. Қоғамдық қабылдау бөлімінің меңгерушісі Дархан Жұмаділов көмек сұрай келген Жанарға «Нұр Отан» партиясының атынан еңбек инспекциясына арыз жазуға кеңес берді. Ал, ІІБ басшысы күш көрсеткен азаматтың үстінен қылмыстық іс қозғалатындығын айтты.
{jcomments on}“Көмек сұрай барсаң, дөрекі немесе селқос жауап қайырады”. Бұл құқыққорғау органдары қызметкеркерлеріне өкпесі қара қазандай Айтжамал апаның айтқаны. Оның сөзіне сүйенсек, тәртіп сақшыларының өздері де өз істерін толыққанды орындап отырған жоқ. Барса болды, сылтау айтып, шығарып салады екен. Айтуынша, 6-шы қаңтар күні үйі тілсіз жаудың қызыл жалынына ораныпты. Оқыс оқиғаның себебін тексеру қорытындысы бойынша сарапшылар екі нұсқа келтіріп отыр. Біріншісі, өрт пештен басталса, екіншісі, кісі қолымен қасақана жасалғанға саяды. Айтжамал апа бір мәмілеге келген шешім ұсына алмай отырғанын айтады.
— Мен шығарылған шешімге қол қойған жоқпын. Өйткені, үйімді қасақана біреу өртеген болуы мүмкін. Міне, содан бері 2 ай өтті. Ешкім де келіп оны тексеріп, анықтап жатқан жоқ. Бұл мәселемен Затон аудандық полиция бөліміне үш рет бардым. Одан кейін тергеу бөлімінің қызметкерлеріне: «Мен сіздерге қарайтын аумақта тұрамын, келіп өрт болған жерді өз көздеріңізбен көріңіздер»,- дедім. Алайда, бірде-бір рет келген адам болмады», — деді қала тұрғыны. Шағымын мұқият тыңдаған ІІБ басшысы Жұмабек Исадилов өз кезегінде тиісті құзырлы орган өкілдеріне бұл мәселе жайында тапсырма беретіндігін жеткізді. Сонымен қатар, алдағы уақытта арызданушының өтініші бойынша тексеру шаралары жүргізіліп, нақты өрттің неден шыққаны анықталмақ.
Әртүрлі мәселелерді тыңдаған Жұмабек Исадилов жиын соңында арыз-шағымдардың барлығы дерлік назардан тыс қалмайтындығын айтты.
Әйгерім СӘРСЕНҒАЛИ,
«Семей таңы»
