АБАЙ ЕСКЕРТКІШІНЕ ТАҒЗЫМ ЕТТІ
Абай Құнанбайұлының 175 жылдығына орай, жақсы іске жаны іңкәр азаматтар — Ернат Мэлсұлы, Дәулетқали Асауов пен Жасұлан Үкеев Нұр-Сұлтан қаласынан Жидебайға дейін мың шақырымдық жолды велосипедпен жүріп өтуге бел буған. Басты мақсат – дана, дара ақынның мерейтойына ерекше тарту жасай отырып, ұлылар мекенінен ұлағаты мол рухани қазына алып қайту. Олар жол бойы зиялы қауыммен кездесулер өткізіп, мәңгі өлмес мұра қалдырған ұлы ақынның шығармаларын жастарға насихаттамақ.
Жидебайға дейінгі веломарафонның бастамашысы елордалық ағылшын тілі мұғалімі, «Qazaq English» орталығының директоры және журналист Ернат Мэлсұлы екен. Бұл идеяны Ақмола облыстық тарихи-өлкетану музейінің ғылыми қызметкері Жасұлан Үкеев, «Астана ақшамы» газетінің тілшісі Дәулетқали Асауов қолдап, үш азамат жолға бірге шыққан.
2 қыркүйек күні бас қала әкімдігінің алдындағы Абай ескерткішінің жанынан салтанатты түрде сапарға аттанған веломарафоншылар бір күнде 160 шақырымнан астам жерді жүріп өтіп, Ерейментауға табан тіреген. Одан кейін Павлодар қаласына тоқтап, 7 қыркүйекте Бесқарағай ауданына ат басын бұрған. Ал 8 қыркүйек күні Семей қаласына келіп жетіп, Абай Құнанбайұлы мен Әлихан Бөкейхановтың ескерткішіне тағзым етті.
Веломарафоншыларды қалалық спорт бөлімі мамандары мен жас велошабандоздар Қарағайлы ауданынан күтіп алды. Олар Абай алаңына келіп, Семей қаласы әкімдігінің, Қалалық Мәдениет үйінің қызметкерлерімен жүздесті. Алаңда Қалалық Мәдениет үйінің әртістері Абай рөлін сомдап, мағынасы терең өлеңдерін оқыған соң салтанатты жиынға қатысушылар ақын рухына тағзым етіп, ескертікішіне гүл шоқтарын қойды.
Ернат Мэлсұлының айтуынша, ол 5 жылдан бері велоспортпен белсенді айналысады. Бастапқыда үйден жұмыс орнына дейін қатынап, физикалық дайындықты арттырған соң бірқатар қалааралық веломарафондарға қатысқан. Ұлылар мекеніне саяхат жасамас бұрын марафоншылар қашықтық пен жол бойындағы елді мекендердің, асханалардың орналасуын мұқият зерделенген.
— Біздің басты мақсатымыз — ұлы бабамыз Абайдың асыл мұрасын насихаттауға өзіміздің кішігірім азаматтық үлесімізді қосу. Осы веломарафон аясында біз жастардың назарын Абай Құнанбаевтың өмірі мен шығармашылығына аударуды, сондай-ақ салауатты өмір салтын сақтауға шақыруды мақсат етіп отырмыз. Менің ойымша, велосипед тепкен кез келген өз адам денсаулығын жақсартуға жол ашады,- дейді Ернат Мэлсұлы.
Бұл ойды қуаттаған Жасұлан Үкеев:
— Абай Құнанбайұлының 175 жылдық мерейтойына орай, Абай, Мұхтар, Шәкәрімдей даналарды өмірге әкелген киелі топырақтан рухани азық алып, салауатты өмір салтын насихаттауды көздедік. Абай әлем мойындаған қазақ жазба әдебиетінің негізін қалаған жазушылардың көш басында тұр. Оның шығармаларын терең зерделеп, тағылымынан тәлім алу — бүгінгі ұрпақтың міндеті,- деп толықтырды.
Веломарафоншылардың сапары, ақын мұрасын насихаттаудан бөлек, тың туындылардың жарық көруіне жол ашпақ.
— Қытай халқы Конфуцийді қалай насихаттаса, дәл солай біз Абай идеясын ұлттық деңгейге көтеруіміз керек деп ойлаймын. Біз ақын туған қасиетті топыраққа барып, рухына тағзым етуді, ол өлкеден ұлы ойшылдың өмірі мен шығармашылығына қатысты тың деректер жинап қайтуды көздеп отырмыз. Бас қалаға оралған соң Абай әлемі жайлы көлемді жолжазба дайындауды мақсат еттім,- дейді «Астана ақшамы» газетінің тілшісі Дәулетқали Асауов.
Абай еліне саяхаттауды мұрат еткен ұлтжанды азаматтар Семей қаласынан Жидебайдағы Абай — Шәкәрім кешеніне бет алды.
Әйгерім СӘРСЕНҚАЛИ, «Семей таңы»{jcomments off}
