Осыған дейін шығысқазақстандық дәрігерлер COVID-19 инфекциясынан емделіп шыққан барша өңір тұрғындарын иммундық плазма доноры болуға шақырғаны белгілі. Бүгінде бұл бағыттағы шаралар оң нәтиже беруде. Иммундық плазма доноры болуға ниет білдіріп жатқан семейліктер саны күн санап артып келеді.
Осыған дейін айтылғандай, коронавирустан жазылған адамдардың қан плазмасын науқастарға құю арқылы иммундық жүйені нығайтуға болады. Бұл әдістің нәтижелілігі зертханалық және клиникалық тұрғыдан толықтай дәлелденгені белгілі. Қазіргі таңда аталмыш ем-шара жайында еліміздің барлық тұрғындары, әсіресе донорлар толық хабардар десек те болады.
Сөз орайында айта кетсек, семейліктер иммунды плазмаға қан тапсыруда жоғары деңгейде белсенділік танытты. Біз хабарласқан мамандардың айтуынша, қаламызда орын тепкен Қан орталығына өз еркімен келіп плазма тапсырғандар көп екен. Қазіргі күні де телефон арқылы қоңырау шалып, тілек білдіріп жатқандар бар. Әйтсе де Қан орталығында бүгінде барлық топтағы плазма түрі жеткілікті. Бұл — жергілікті азаматтардың белсенділік танытуының нәтижесі.
Қан плазмасын тапсырғандар арасында әр саланың мамандары, атап айтсақ ұстаздар, әскери қызметкерлер, тіпті сол Қан орталығының дәрігерлері де бар екен.
Солардың бірі жерлесіміз Эльмира Қойшыбаева – қатардағы əскери қызметкер. Ол коронавирусқа шалдығып, аталмыш дерттен құлан-таза жазылып шыққан. Өз басынан өткергендіктен, кеселдің ауырлығын өте жақсы біледі. Сондықтан науқастанған өзге адамдарға көмек беру үшін иммундық плазма тапсыруға арнайы келіпті.
— Əр адамның бойында өзіндік патриоттық сезім бар. Әркім өз халқына мүмкіндігіне қарай көмек бергісі келеді. Мен де COVID-19-ға қарсы күресте өз үлесімді қосуды ойлап, қан плазмасын тапсыруға осында келдім. Бір жағынан, өзім толқып та тұрмын, — дейді пікір білдірген Эльмира Қойшыбаева.
Коронавирустан жазылған кез келген адамның иммундық плазмасы жарай бермейді. Дəрігерлер алдын ала сараптама жасайды, аурудан айыққан адамның бойында дертке қарсы антиденелер табылған жағдайда ғана ол донор бола алады. Бүгінге дейін 100-ге тарта семейлік қан тапсырған. Ерікті түрде келіп жатқандар əлі де көп.
— Халықтың белсенділігі жақсы. Қазіргі күні де хабарласып жатқан азаматтар бар. Донорлар көптеген сырқаттанған адамдардың өмірін сақтап қалуға көмек көрсете алады, — дейді бұл ретте терапевт дәрігер Ботагөз Қалибекова.
Коронавирус дертін емдеуде иммундық плазманы қолдану — еліміз бойынша тəжірибеге енгізілген əдіске айналып отыр. Аталмыш тəсіл өз тиімділігін көрсетті. Бұл орайда COVID-19 індеті басталғалы бері дертті жұқтырғандарды плазма құю арқылы емдеуді Шығыс Қазақстан дəрігерлері алғашқылардың бірі болып іске асырғанын айта кету керек. Сол тәрізді Қан плазмасы банкін құру бастамасы да біздің аймағымызда облыс басшылығы тарапынан алғашқы болып көтерілген еді.
Қалалық Қан орталығы дәрігерлерінің айтуынша, коронавирустың орташа және ауыр түрімен ауырып, одан сауығып шыққан кез келген кәмелеттік жасқа толған адам донор бола алады. Ең бастысы, аурудан айыққанына кем дегенде екі апта өтсе болғаны. Плазма доноры болу үшін жергілікті мекенжай бойынша ОДА-ға барып, антиденеге тест өткізу керек.
Бұдан соң емханалық-биохимиялық көрсеткіш пен қан тобыңызды анықтатуыңыз қажет. Егер сараптама қорытындысы оң болса, қан тапсыруға жібереді. Плазма доноры болуға ынта білдірген әр азамат Қан орталығына хабарласып, қосымша ақпарат ала алады.
Әлібек КЕМЕЛХАН, «Семей таңы»{jcomments off}
