Шығыс Қазақстан облысының әкімі Даниал Ахметов өңірдегі эпидемиологиялық ахуалға байланысты аудан әкімдерімен кезекті жиналыс өткізді. Бұл туралы облыс әкімі әлеуметтік желідегі жеке парақшасында жазды.
Аймақ басшысы жиыннан бір күн бұрын індеттің өршуіне байланысты Зайсан, Алтай аудандары мен Риддерге мамандар тобын, яғни Семей қалалық жедел медициналық жәрдем ауруханасының, сондай-ақ Өскемендегі облыстық және №4 қалалық ауруханаларының жоғары санатты дәрігерлерін, атап айтқанда пульмонологтерді, инфекционистер мен реаниматологтерді жіберуге тапсырма берген болатын. Себебі аталған аудандарда COVID-19 вирусы мен ковидті пневмонияның кең таралуы байқалып отыр.
Арнайы топ орталық ауруханалардағы стационарлардың, оның ішінде инфекциялық және провизорлық төсек — орындардың, сонымен қатар емханалардың жұмысын толық зерделеуде. Аймақ басшысының айтуынша, жүргізілген тексерудің алғашқы нәтижелері бойынша аумаққа бөлу талаптары мен емдеу хаттамасын сақтауда бірқатар бұзушылықтар анықталған. Жұмыс жалғасады. Алдағы уақытта бұл ауруханалар осы аудандарға жетекшілік етіп, жұмыс барысында жан-жақты, тәжірибелік және консультативтік көмек көрсетпек.
Облыс әкімі азық-түлікке тапсырыс беру үшін колл-орталықтардың жұмысы қайта басталғанын хабарлады. Бұл жұмысқа қолдау көрсетіп, осындай қысылтаяң сәтте қол ұшын созып, азық-түлікті тегін жеткізу қызметін ерікті түрде ұсынған еріктілерге шексіз алғысын білдірді. Шығыс Қазақстан облысында індет жұқтыру жағдайы жиілеп, көш бастап тұр.
— Қазіргі уақытта облыс аумағында COVID-19 вирусын жұқтырған науқаспен байланыста болған адамдардың тарапынан карантин талаптарының сақталуына белсенді тексеру жүргізілуде. Бұл жұмысқа учаскелік полицейлер де жұмылдырылды. Облыстың барлық тұрғындарынан әлеуметтік жауапкершілік танытып, санитарлық-эпидемиологиялық қызмет талаптарын орындауын сұраймын, – деді облыс әкімі Даниал Кенжетайұлы.
Өз тілшіміз
{jcomments off}
