Апта басында Мемлекет басшысы Қасым-Жомарт Кемелұлы Тоқаевтың төрағалығымен коронавирус инфекциясының таралуына қарсы іс-қимыл жөнінде кезекті жиналыс болып өтті. Жиын барысында облыс әкімі Даниал Ахметов Президентке өңірдегі эпидемиологиялық жағдай мен оны тұрақтандыру бағытында қабылданған шаралар туралы баяндады.
Қазіргі таңда Шығыс Қазақстан облысы бойынша коронавирус инфекциясының таралу қарқыны қолға алынған іс-шаралардың нәтижесінде біршама тұрақтанды. Санитарлық талап күшейтіліп, бірқатар қалалар бойынша карантиндік шектеу шаралары қолға алынған болатын. Әйтсе де босаңсуға болмайды.
Мемлекет басшысы Қасым-Жомарт Кемелұлы облыс әкімі Даниал Кенжетайұлына нақты тапсырмалар берді, оның ішінде облыс көлеміндегі инфекциялық стационарлардағы реанимация бөлімшелерін жабдықтауға ерекше назар аударуды міндеттеді. Сондай-ақ, КВИ-ді емдеу хаттамасына сәйкес, медициналық мекемелерде дәрі-дәрмектердің қажетті қорын, сонымен қатар жеке қорғаныс құралдарымен қамтамасыз етуді де тапсырды.
{jcomments off}Аймақ басшысы атап өткендей, қазіргі таңда ШҚО-да медициналық құралдармен жабдықталған 6200 төсек-орын толықтай дайын тұр. Қазіргі уақытта олардың 3700-ден астамы қажеттілікке орай іске қосылды.
Бұл шаралардың сыртында аймақ бойынша инфекциялық бөлімшелер 100% оттегімен қамтамасыз етілген. Сонымен қатар жақын арада, Президент тапсырмасына орай, реанимациялық төсек-орын қорын екі есеге арттыру жоспарланып отыр.
«Айта кетейін, науқастарды емдеудің тиімділігін арттыру үшін өңірге «Фавипиравир» препараты сатылып алынды. Ол хаттама бойынша рұқсат етілген және сырқаттанған азаматтардың келісімімен ғана тағайындалады.
Сондай-ақ біз Коронавирус инфекциясы ошақтарын оқшаулау орталығын іске қостық, ол жедел түрде шұғыл шаралар қабылдауға, жұқтырған және байланыста болған адамдар бойынша маңызды ақпарат алуға мүмкіндік береді»,- деді өз сөзінде аймақ басшысы.
Жиын барысында Қасым-Жомарт Кемелұлы тағы бір мәрте барша тұрғындарды қатаң тәртіпті сақтауға, ұйымшылдық танытуға және уақытша шектеу шараларына түсіністікпен қарауға шақырды.
Өз тілшіміз
