17 қараша күні ШҚО ішкі саясат басқармасының қолдауымен және «Жастар және балалар ұйымдарының қауымдастығы» Семей қалалық филиалының директоры Эльзира Жунусованың ұйымдастыруымен Zoom платформасында «NEET санатындағы жастарды әлеуметтендіру жөніндегі шаралар кешенін іске асыру»жобасының қорытындысы бойынша брифинг өтті.
Мемлекет басшысы Қасым-Жомарт Тоқаев өткен жылғы халыққа Жолдауында: «Жыл сайын 21 мыңға жуық мектеп түлегі кәсіби және жоғары оқу орындарына түсе алмай қалады. Жастардың бұл тобы жұмыссыздар мен маргиналдардың негізін құрайды. Олар амалының жоқтығынан қылмыстық және экстремистік ағымдардың ықпалына түсуде»,- деп, жастарды жұмыспен қамту мәселесінің өзекті екенін айтқан болатын.
{jcomments off}Ғылымда NEET термині ағылшын тіліндегі «Not in Empoloyment. Education or Training» сөздерінен құралған. Қазақ тіліне тәржімаласақ, «не жұмыс істемейтін, не оқымайтын, не өзге де істермен айналыспайтын адам» деген мағына береді.
2020 жылдың 1 қаңтарындағы мәлімет бойынша, еліміздегі жастар саны 3 765 383 адамды құрайды. Оның 2 125 065-і қалалық, 1 640 318-і ауылдық жастар. Ал Шығыс Қазақстан облысында 244 005 жас болса, оның 147 456-сы қалада, 96 546-сы ауылда тұрады екен.
Брифинг барысында «NEET санатындағы жастарды әлеуметтендіру жөніндегі шаралар кешенін іске асыру» жобасы аясында ұйымдастырылған іс-шаралар туралы, сонымен қатар ШҚО-да жастарға арналған «Жасыл Ел», «Дипломмен — ауылға», «Еңбек», «Жастар тәжірибесі» және басқа да бағдарламалардың іске асырылу барысы туралы айтылып, NEET санатындағы жастардың жағдайын әлеуметтік зерттеудің қорытындылары талқыланды, жастарға ерте кәсіби бағдар берудің маңыздылығы жайлы сөз болды.
Эльзира Жунусованың айтуынша, жоба аясында облысымыздағы «NEET» санатындағы жастарды жұмысқа орналастыру бағытында көптеген жұмыстар жүзеге асқан. Айталық, 30 қазанда Семей және Риддер қалаларында, сондай-ақ Алтай, Аягөз, Үржар, Глубокое аудандарында жұмыссыз жастарға арналып «Жастарға кеңес» консультациялық орталықтары ашылған. Кеңес беру орталықтарын ашудағы мақсат — жұмыссыз жастарға жұмысқа орналасудың жолдары және жастарға арналған мемлекеттік бағдарламалар туралы ақпарат беру.
— Семей және Риддер қалаларында, Алтай, Аягөз, Үржар, Глубокое аудандарында ашылған орталықтың қызметіне жұмыспен қамту бөлімінің қызметкерлері, Тұрғын үй құрылыс жинақ банкінің және Жастар ресурстық орталықтарының өкілдері тартылды. Қазіргі таңда жастар арасында тұрғын үй және жұмысқа орналасу мәселесі өзекті болып тұр. Орталық мамандары жастарға, негізінен, осы мәселелер бойынша кеңес беруде.
Кейінгі жылдары жастар арасында жеке кәсіп ашып, өз ісін дамытуға ден қойғандардың қатары көбейіп келе жатқаны қуантады. Бұл орайда «Жас кәсіпкер» сынды мемлекеттік бағдарламалардың жақсы қолдау болғанын айта кету керек. Кеңес беру орталықтары халық көп жиналатын жерлерде аптасына бір рет, негізінен, демалыс күндері жұмыс істейді,- деді Эльзира Жунусова.
Брифинг соңында БАҚ өкілдері бұл жобаны одан әрі жалғастыру жайлы ұсыныс айтты.
Жадыра ТӨЛЕГЕНҚЫЗЫ, «Семей таңы»
