Қала әкімі Ермак Сәлімов көп балалы және аз қамтылған отбасылар мен жетім балаларға Қарағайлы ықшам ауданындағы 9 қабатты жаңа үйден пәтер кілттерін табыстады.
— Бүгін біз, қалыптасқан игі дәстүр бойынша, семейліктердің қуанышын бөлісу үшін жиналдық. Аталған шара Қазақстан Республикасының Тұңғыш Президенті күнінде өткізілуде. Елбасының арқасында көп ұлтты Қазақстан халқы келісім мен бірлікте өмір сүріп жатыр. Біз өз болашағымызға сенімдіміз, өйткені біз мықты, тәуелсіз және қарқынды дамып келе жатқан мемлекетте өмір сүріп жатырмыз. Біз Елбасының сарабдал саясатының арқасында елімізде қысқа мерзім ішінде жүзеге асырылған барлық өзгерістердің куәсі болдық. Бүгінде елімізбен бірге сүйікті Семейіміз де дамып келеді. Оның жарқын көрінісі – заманауи келбеттегі Қарағайлы ықшам ауданы, бүгін біз кезекті рет жаңа пәтерлердің кілттерін табыстаудамыз. Мерекелеріңізбен, құрметті жерлестер! Қоныстарыңыз құтты болсын! – деді қала басшысы.
Жаңа пәтерге ие болған отбасылар да қуаныштарымен бөлісті.
— Мен жетім ретінде кезекте ұзақ жыл тұрдым, енді, міне, мереке күні пәтер алып тұрмын, бұл мен үшін өте үлкен сыйлық болды, – дейді жаңа баспанаға қоныстанушылардың бірі Марина Панчуковская.
Салтанатты шарадан соң қала басшысы Ермак Сәлімов пәтерлерді аралап көріп, қоныстанушыларды тағы бір мәрте мерекелерімен құттықтады.
Жыл соңына дейін тек Семей қаласында ғана 252 отбасыға жаңа пәтер беріледі. 125 пәтер көп балалы отбасыларға, 51-і балалар үйінің тәрбиеленушілеріне және 76 пәтер халықтың әлеуметтік осал топтарына беріледі.{jcomments off}
