Облысымыздағы карантиндік шектеу шаралары өз нәтижесін беруде. Қолға алынған жұмыстардың нәтижесінде өңіріміз коронавирустың таралу қаупі бойынша «қызылдан» «сары» аймаққа өтті. Бұл туралы облыс әкімі Даниал Ахметов өзінің әлеуметтік желілердегі жеке парақшасында жазды.
«Ортақ күш-жігеріміздің және аймақ халқының жоғары жауапкершілігінің арқасында біз COVID-19 инфекциясының таралу деңгейін төмендете алдық. Бүгінде облыста коронавирустың таралу коэффициенті бәсеңдеді. Вирус жұқтырғандар саны 7 қарашада 353 адам болса, кеше 73-ті құрады. Ең бастысы, өңірімізде Оқшаулау орталығы арқылы вирустың жұқтыру тізбегін бақылау және тосқауыл қою жүйесі құрылған. 1 қарашадан бастап 584 медициналық-эпидемиологиялық топ инфекцияның 3,5 мың ошағында байланыста болған 21 618 адаммен жұмыс жүргізді», — деп жазды аймақ басшысы Даниал Ахметов өзінің Facebook-тегі жеке парақшасында.
Атап айтар болсақ, соңғы апталарда аймақта коронавирустың көбею коэффициенті бәсеңдеп келеді. Қарашаның басындағы жағдаймен салыстырғанда репродуктивті R саны 1,85-тен 0,84-ке дейін, ал төсек қорының қамтылу пайызы 31,1-ден 14,5-ке дейін төмендеген.
Сонымен қатар, облыс әкімі Даниал Кенжетайұлы айтып өткендей, COVID-19 ауруын уақтылы анықтап, емдеу үшін қолданыстағы 13 ПТР-зертханасына жергілікті бюджет есебінен қосымша зертханаашылған. Бір бұл емес, алдағы күндері тағы біреуі ашылмақ.
Аталмыш шаралардың аясында, коронавирус сырқатының алдын алумен қатар, оны дер кезінде анықтаудың да маңыза зор екендігін айта кету ләзім. Мәселен, біздің облысымызда әлемдік пандемия басталғаннан бері 355 мың тест өткізіліпті, оның ішінде тек қараша айында ғана 101 095 зерттеу жүргізілген екен. Бұл еліміз бойынша ең жоғары көрсеткіштердің бірі саналады екен.
Сонымен қатар аймағымыз бойынша аудандар мен қалаларда құрылған мониторингтік топтар да тиімді жұмыс атқарды. Оның құрамына полиция қызметкерлері, жергілікті атқарушы органдардың өкілдері, санитариялық-эпидемиологиялық бақылау департаментінің мамандары кіреді.
Қараша айынан бастап 166 топ 1906 рейдтік шаралар өткізіпті. Жалпы саны 4426 нысан тексеріліп, оның 1055-інде бұзушылықтар анықталған. Соның нәтижесінде жалпы сомасы 48 млн теңгеге 735 айыппұл салыныпты. Дегенмен облыстың барлық қалалары мен аудандарында өткен соңғы күндердегі кезекті рейд барысында ереже бұзу фактілері бұрынғыдай көп тіркелмеген. Осының өзі жергілікті тұрғындардың бұрынғыдай емес, карантин талаптарына жауапкершілікпен қарай бастағанын айғақтайды.
Облысымыздың «қызыл» аймақтан «сарыға» өтуіне жергілікті дәрігерлер қауымының да елеулі үлесі бар. Өңіріміздегі медицина қызметкерлері тұрақты негізде COVID-19 инфекциясын жұқтырған науқастарды емдеу кестесін өзектендіру жұмысын жүргізуде. Соның бір дәлелі — 12 қарашадан бастап науқастардың келісімімен облыстың ауруханаларында «Фавипиравир» препараты қолданылуда. Қазіргі күнгі нәтижесі жақсы, сырқаттан сауыққан азаматтар саны артқан.
Сонымен қатар донорлардың көмегімен жиналған Семей қаласы мен облыс орталығы Өскемен шаһарындағы қан орталықтарындағы 3200 иммундық плазма да белсенді түрде қолданылып жатыр.
Міне, осы және басқа да маңызды шаралардың нәтижесінде Шығыс Қазақстан облысы еліміз бойынша алғаш рет коронавирустың «қызыл» аймағынан «сары» аймағына төмендеп отыр.
Алайда індетке қарсы қолданылатын вакцина әзірге жоқ, сондықтан КВИ-ден қорғанудың ең сенімді жолы санитарлық талаптарды сақтау болып қала бермек.
Осы орайда облыс басшысы Даниал Ахметов әлеуметтік желі арқылы барша жерлестерін қазіргі таңда күшінде қалдырылған карантиндік шектеу шараларын қатаң сақтауға, санитарлық-эпидемиологиялық талаптарды орындауға шақырды.
«Біздің қазіргі басты міндетіміз — сырқаттың өсуіне жол бермеу, емдеу мекемелерінің тиімділігін арттыру және халықтың денсаулығын сақтауды қамтамасыз ету. Өзіңіз бен жақыныңызға қорған болыңыз!» — деп жазды бұл орайда аймақ басшысы.
Әлібек КЕМЕЛХАН, «Семей таңы»{jcomments off}
