Сәрсенбі, желтоқсан айының 2-і күні ШҚО бас мемлекеттік санитарлық дәрігерінің міндетін атқарушының жаңа қаулысы шықты. Құжатта аймағымызда шектеу шараларының мерзімі 17 желтоқсанға дейін ұзартылғандығы туралы жазылған.
Бас санитардың жаңа қаулысына сүйенсек, бірқатар шектеу шаралары өз күшінде қалады. Атап айтар болсақ: «Облысаралық және халықаралық автобустар қозғалысына тыйым салу сақталды. Әлеуметтік қашықтық пен маска режимін сақтаған кезде халықтың көшелерде, саябақтарда, алаңдарда, жағалауларда және серуендеу аймақтарында жүріп-тұруларына рұқсат етілді. Сонымен қатар қарттар мен мүмкіндігі шектеулі адамдарға арналған медициналық-әлеуметтік нысандарда, балалар үйлерінде, әлеуметтік оңалту орталықтарында, мектеп-интернаттарда және медициналық ұйымдарда қызметкерлерді және пациенттерді күн сайынғы таңертеңгі тексеруден өткізу жалғасады»,- делінген аталмыш құжатта.
Ата-аналарға ПТР әдісімен COVID-19-ға зертханалық тексеруден теріс нәтижелерін алған күннен бастап мерзімі үш күннен аспаған құжатты ұсынған кезде жетім балалармен кездесу үшін, оларды одан әрі асырап алу үшін, қорғаншылықты, қамқоршылықты белгілеу үшін балалар үйлеріне баруларына рұқсат етілді.
«Фитнес-орталықтар, моншалар мен сауналар (толтырылуы 50%-дан аспауы тиіс), кітапханалар, мұражайлар жұмыс күндері қайта ашылады. Ғимараттардан тыс орналасқан мұз айдындарына киім ауыстыру және келушілерге арналған үй-жайларды жаба отырып жұмыс істеуіне рұқсат етіледі. Медицина орталықтары, стоматологиялар алдын ала жазылу бойынша жұмыс істейді», — делінген қаулыда.
Сөз орайында айта кетейік, өткен тәулікте, яғни желтоқсанның 2-ші жұлдызында Шығыс Қазақстан облысында 140 адамнан коронавирус белгілері анықталған. Аймағымызда бұл инфекцияны жұқтырғандар саны анағұрлым төмендегенімен, Шығыс Қазақстан облысы тізім бойынша республика көлемінде бірінші орында тұр. Демек, әлі де болса сақтық шараларын күшейтуді талап етеді.
Ал coronavirus 2020.kz деректеріне сүйенсек, осы күні елімізде 769 адамнан коронавирус инфекциясы ПТР арқылы анықталыпты. Жалпы, ел бойынша аталмыш сырқатпен ауырғандар саны 133 887 адамды құрап отыр.
Өз тілшіміз{jcomments off}
