Өткен жұма, 4 желтоқсан күні Шығыс Қазақстан облысының білім басқармасы Семей қаласындағы Д.Қалматаев атындағы мемлекеттік жоғары медицина колледжімен бірлесіп «Абай тағылымы» атты ШҚО колледждерінің студенттері арасында облыстық волонтерлер слетін өткізді.
Волонтерлер слеті ZOOM платформасы арқылы онлайн режимінде өтті. Шараға Шығыс Қазақстан облысының 51 колледжінен 200 волонтер студент, колледж директорлары, директордың тәрбие ісі жөніндегі орынбасарлары, еріктілер клубтарының жетекшілері қатысты. Слеттің мақсаты — Шығыс Қазақстан облысының колледждері мен жоғары оқу орындарының студенттері арасында еріктілер қозғалысын дамыту. Шара барысында әр қатысушы өз оқу орнының ерікті жастарының жетістіктері туралы бейнекөрсетілім мен екі таныстырылым ұсынды.
— 5 желтоқсан – Дүниежүзілік волонтерлер күні. БҰҰ Бас ассамблеясының бастамасымен 1985 жылдан бастап 5 желтоқсанда волонтерлердің халықаралық күні аталып өтеді. Біздің елімізде де волонтерлік қызмет жыл санап дамып келеді. Белсенді жастар мен азаматтар жиналып, балалар үйлеріне, арнайы медициналық мекемелерге, қарттарға, науқас адамдарға, мұқтаж жандарға ерікті түрде көмектесіп жүр. Республика көлемінде қазіргі күні 200-ден астам волонтерлік ұйым тіркелген екен.
Еріктілер халық үшін қайырымдылық пен жанашырлықтың, мейірімнің, шынайылықтың символына айналды. Волонтерлік – нағыз патриотизмнің көрінісі. Президент Қасым-Жомарт Кемелұлы биылғы жылды Волонтерлер жылы деп жариялады.
Мен ерікті жастарымызды мақтан тұтамын. Әіресе пандемия кезіндегі ерен еңбектері үшін ризашылығымды білдіремін. Біз әрқашан біргеміз!- деді колледж директоры Саят Танатаров.
Слетте Дүйсенбі Қалматаев атындағы мемлекеттік жоғары медициналық колледж ТжКБ бөлімінің бас маманы Гүлмира Ильясова «Техникалық және кәсіптік білімі бар волонтерлердің облыстық және республикалық іс-шараларға қатысуы» тақырыбында, директорының тәрбие ісі жөніндегі орынбасары Гүлжан Тулумгужинова «Біздің еріктілердің жетістіктері мен жетістіктері» тақырыбында ой қозғады.
Сонымен қатар Шығыс Қазақстан облысы білім басқармасы басшысының орынбасары Қажұмқан Оспанғалиев, облыстық ішкі саясат басқармасы жастар саясаты бөлімінің басшысы Еркебұлан Балтабеков, Ұлттық еріктілер желісінің атқарушы директоры Татьяна Миронюк, Шығыс Қазақстан облысының жастар мен балалар ұйымдары қауымдастығының Семей қаласындағы филиалының жетекшісі Эльзира Жүнісова, «Исток» балалар мен жасөспірімдер шығармашылығы орталығы» қоғамдық бірлестігінің директоры Людмила Михайлова, «Исток» еріктілер орталығының жетекшісі Ольга Таранова, «Lider.kz» волонтерлері онлайн режимінде қосылып, ерікті студенттерді мерекемен құттықтады. Өз кезегінде слетке қатысушы волонтерлер хакім Абай айтып кеткен «талап, еңбек, терең ой, қанағат, рақым» қасиеттерін, «толық адам», адалдық, әділдік, мейірімділік сияқты жалпы адамзатқа ортақ құндылықтарды әр адам бойына сіңіруі қажет деген тұжырымға келді.
Жадыра ТӨЛЕГЕНҚЫЗЫ, «Семей таңы»{jcomments off}
