Сонымен, 10 қаңтар күні, бүкіл еліміздегі тәрізді, біздің облысымызда да 932 907 сайлаушы өз таңдауын жасады. Өткен желтоқсан айының 10 күні бастау алған бұл саяси науқанға тек оған қатысушы партиялар ғана емес, облыстық сайлау комиссиясы да тыңғылықты дайындалған болатын.
Аймағымыз үшін биылғы сайлау несімен ерекше болды? Бірінші кезекте, әрине, санитарлық талаптардың сақталуы мен учаскелердің техникалық тұрғыда жабдықталуын айтар едік.
Сайлау учаскелеріндегі комиссия мүшелері мен байқаушылар, сенімді өкілдер және сол жердегі техникалық қызметкерлердің барлығы да ПТР-тестіден өтті. Әр екі сағат сайын дезинфекция жасау жағы да қарастырылған болатын. Әрбір сайлаушы келген бойда дене температурасы өлшеніп отырды. Дене қызуы бар азаматтар жеке бөлмеге оқшаулану арқылы дауыс берді. Бұл да сақтық үшін жасалған амал болатын.
Саяси науқанды бақылау үшін шығысқа шетелден 8 байқаушы келді. Олардың екеуі Еуропадағы қауіпсіздік және ынтымақтастық ұйымынан болса, алтауы ТМД елдерінің байқаушылар комиссияның өкілдері екен.
Жалпы, аймақта құрылған 1039 сайлау учаскесіндегі дауыс беру барысын бір мыңға жуық байқаушы қадағалап отырды.
Айта кететін тағы бір жайт, маңызды саяси науқанға жергілікті атқарушы билік өкілдері тарапынан қарқынды түрде даярлық жұмыстары жүргізілген болатын. Бұл күні барлық қалалар мен аудандар әкімдері де сайлау учаскесіне келіп дауыс берді.
Ал ШҚО әкімі Даниал Ахметов Өскемен қаласының №42 орта мектебінде орналасқан 9-шы сайлау учаскесінде дауыс берді. Мұнда барлығы 2 426 сайлаушы тіркелген. Бұл — қала бойынша алғанда орташа көрсеткіш. Олардың 600-ге жуығы сағат 12:00-ге дейін өз таңдауын жасап үлгерді.
– Сайлауға келушілер қарасы көп екен. Бұл — өте қуантарлық жайт. Жерлестеріміздің маңызды саяси науқаннан шет қалмай, дауыс беріп, азаматтық ұстанымын білдіруі біздің дұрыс бағытта келе жатқанымызды аңғартса керек. Сондай-ақ бүгін сайлау учаскесіне келушілердің арасында әйел адамдар да көп екенін байқадым. Бұл нәзік жандыларымыздың ел болашағына бейжай қарамайтындығының тағы бір дәлелі,- деді бұл ретте ШҚО әкімі Даниал Ахметов.
Барлық сайлау учаскелері медициналық маскалармен және өзге де қорғаныш құралдарымен жабдықталғанын да айта кету ләзім.
Бұл күні облыста, барлық қалалар мен аудандарды қоса алғанда, 1 039 сайлау учаскесі қызу қарқынмен жұмыс істеді. Онда тұрғындардың еш қиындықсыз келіп дауыс беруіне барлық жағдайлар жасалды.
Сонымен қатар облысымыз бойынша осыдан екі ай бұрын құрылған «Таза сайлау» қозғалысының мүшелері де сайлау барысын бақылауға алды. Олардың мәліметінше, барлық учаскелерде заңға қайшы әрекеттер байқалмаған.
Екі ай уақыт ішінде қозғалыс мүшелері 5 мыңға жуық бақылаушыны оқытып, дайындаған. Олар елдегі сайлау учаскелеріндегі тәртіпті тыңғылықты түрде қадағалады. Аталмыш қозғалыстың мүшелігінде қоғам белсенділері, журналистер және жазушылар қауымы бар екендігін айта кету орынды.
Жалпы статистикаға тоқталар болсақ, сайлау күні жергілікті электораттың 72,4 пайызы сайлау учаскесіне келіп дауыс берген. Бұл — республикамыз бойынша өте жоғары көрсеткіш саналады.
Әлібек КЕМЕЛХАН, «Семей таңы»{jcomments off}
