Бүгінде Шығыс Қазақстан облысы бойынша «Цифрлық Қазақстан» мемлекеттік бағдарламасы аясында шалғайдағы шағын станциялардың интернетке қолжетімділігін қамтамасыз ету ісі ерекше қарқын алып отыр. Әсіресе шағын ауылдарды кең жолақты интернетпен қамтуды жалғастыру үшін 2018 — 2022 жылдар аралығында талшықты-оптикалық және LTE желілерін кезең-кезеңмен салу ісі жүзеге асуда. Міне, осы орайда аудандық әкімдіктердің күш салуы нәтижесінде біршама ілкімді жұмыстар атқарылуда.
Осыған дейін «Транстелеком» АҚ-ның Семей қаласындағы филиалы аталған бағдарлама шеңберінде Бородулиха, Жарма, Аягөз аудандары бойынша бірқатар іс-шаралар жүзеге асырылған болатын. Мәселен, өткен жылдың қорытындысы бойынша, «Семейтранстелеком» филиалы «Елді мекен 250+» «Цифрлы Қазақстан» бағдарламалары аясында ауылдық елді мекендер тұрғындарының игілігі үшін, соның ішінде, алғашқы кезекте өндірісі өркендеп келе жатқан жекелеген елді мекендер – Жарма ауданындағы Суықбұлақ, Әуезов кенті, Жаңғызтөбе және Қапанбұлақ, Үшбиік ауылдарындағы мемлекеттік мекемелер талшықты-оптикалық желіге қосылды. Бұл ауылдардағы жергілікті халық ендігі аралықта білім беру мен медициналық қызмет көрсету саласы бойынша жаһандық желіге шығуға мүмкіндік алды.
Бұл ретте Ақтоғай мен Аягөз қаласының дәл ортасында орын тепкен Тарлаулы ауылдық округінің 100-ден аса тұрғыны аса жоғары жылдамдықтағы интернетпен және заманауи цифрлы телевидениемен қамтамасыз етілгенін де айта кету орынды.
— Қазіргі күндері «Транстелеком» АҚ телекоммуникация саласы ғана емес, АТ, автоматика және энергетика саласындағы жүйені де интеграциялауға мамандандырылған. Ал теміржолшылар игілігі үшін биылғы жылғы атқарылған жұмыстарды, сөз жоқ, үлкен жетістік деуге болады, — дейді жергілікті мамандар.
Сонымен қатар жергілікті атқарушы биліктің байланыс операторлары басшыларымен тығыз қарым-қатынас орната отырып жұмыс жүргізуінің нәтижесінде Жарма және Аягөз аудандарындағы кейбір шағын ауылдардың халқы ұялы телефон байланысына да қол жеткізді. Бұл бағыттағы жұмыстар әлі де жалғаспақ. Атап айтсақ, Жарма, сонымен қатар Аягөз ауданындағы Шұбартау өңірі, Бородулиха сынды шалғайда орын тепкен тағы да басқа көптеген елді мекендерді ұялы байланыспен қамту ісі таяу аралықта жүзеге аспақ.
Түйіндей айтсақ, ағымдағы жылы облысымыз бойынша, Мемлекет басшысының тапсырмасына орай, халықты ғаламтормен және ұялы байланыспен қамту мақсатында нәтижелі жұмыстар атқарылып жатыр. Бұл әсіресе жастардың аталмыш елді мекендерге жұмысқа тартылуына елеулі түрде септігін тигізеді деген сенімдеміз.
Азамат ЕРСАЙЫН, «Семей таңы»{jcomments off}
