Семейліктер Заманауи интерактивті әдістер арқылы Мемлекет басшысының Жолдаулары мен Елбасының қызмет жылнамасын таныстыруға мүмкіндік беретін жылжымалы көрме арқылы Ұлт көшбасшысының еңбек жолымен танысуға, Жолдауларын жете түсінуге мүмкіндік алды. Жылжымалы көрме бұған дейін Көкшетау, Павлодар, Петропавл, Өскемен сынды ірі қалаларда да ұйым— дастырылған екен. Семей қаласында да Назарбаев орталығының ұйымдастыруымен өткен көрмені көруге балалар мен жастардың шығармашылық сарайына қала тұрғындары, студент— тер мен жастар да көп жиналды.
Екі күнге созылған «Қазақстан — 2050» Стратегия-сы Назарбаевтың қазақстандық жолы» интерактивті экспозициясында «Қазақстан жолы — 2050: Бір мақсат, бір мүдде, бір болашақ» атты Жолдауы және «Елін сүйген, елі сүйген Елбасы» атты Президент қызметінің жылнамасын қамтитын интерактивті стендтер, Мемлекет басшысы туралы 3D фильмдердің мультимедиялық бұрышы, Назарбаев орталығы қызметін көрсететін touch-үстел, «Елбасының өмірбаяны — елдің ғұмырнамасы» атты 3D панорамасы және Назарбаев орталығының Баспа үйі кітаптарының аудио нұсқалары қамтылған.
Көрме барысында қонақтарға арналып Президент Жолдауының негізгі бағыттары мен Н.Ә. Назарбаевтың өмірбаянынан сыр шертетін сұрақ-жауап түрінде «Мәңгілік Ел» байқауы өтті. Сауалдарға жарыса жауап берген студенттер арасында байқауға белсене қатысқан зейнеткерлер де болды. Жолдауға қолдау танытатындықтарын байқатқан семейлік жастар астаналық Назарбаев орталығы мамандарының да көңілдерінен шықты. Назарбаев орталығының жетекші ғылыми қызметкері Дәурен Базаров басты мақсат — Елбасының биылғы Жолдауын және «Қазақстан-2050» Стратегиясын халыққа қарапайым тұрғыдан түсіндіру екендігін айта келе, соңғы үлгідегі технологияларды қолдана отырып, көпшіліктің қызығушылығын ояту мақсатында ұйымдастырылған көрмеге семейлік тұрғындардың құлшыныспен келіп жатқандығын атап өтті.
{jcomments on}- Еліміздің бірқатар аймақтарында үлкен сұранысқа ие болған жылжымалы көрме семейлік жастардың да қызығушылығын оятты. Екі күннен бері келіп, өз ойларын ортаға салып жатқан жастарды көріп, Семей өңірінде де белсенді жастар шоғыры мол екендігіне көз жеткіздік, — дейді Дәурен Базаров.
— Бүгінгі көрме біз үшін қызықты болды. Елбасының еңбегін интерактивті әдіс арқылы паш ету – жаңа дәуірдің басталғанындай әсер қалдырды. Мұнда жиналғандар – жүрегінде «Қазақ» деген оты бар, белсенді жастар деп білемін,- дейді көрмеге келген Рауан Серікхан.
Жиылған қауымға жаңаша серпін сыйлаған шара барысында Назарбаев орталығының Баспа Үйі Елбасының кітаптарының электронды нұсқасын да ұсынды. Қонақтар қажетті кітаптарын AppStore, Play Market, Marketplace сынды электронды қосымшалар арқылы тегін жүктеуге мүмкіндік алды. Байқауға қатысып, белсенділік танытқан жастарға Елбасының кітаптары мен кітапшалары, дискілер таратылды. Кездесу — Тәуелсіз Қазақстанның қалыптасуы мен Мемлекет басшысының қызметі туралы деректі фильмді тамашалаумен қорытындыланады.
Әйгерім СӘРСЕНҒАЛИ,
«Семей таңы»
