ҚМДБ-ның төрағасы, Бас мүфти Ержан қажы Малғажыұлы хазіреттің бастамасымен жарық көрген «Дін мен дәстүр» кітабының тұсаукесері өткен аптада қаладағы Достық үйінде өтті. Аталмыш кітаптың тұсаукесеріне Семей қалалық ішкі саясат бөлімінің басшысы Ғалия Смаиылова, осы бөлім басшысының орынбасары Айдар Садырбаев, ҚМДБ – сы Семей өңірі бойынша өкіл имамы Мақсат қажы Алтыбай бастаған мешіт имамдары және ардагерлер қауымы қатысты.
«Дін мен дәстүр» — еліміздің Бас мүфтиі Ержан қажы Маямеровтің бастамасымен жарық көрген кітап. Кітапта ата-бабаларымыздан ұрпаққа мұра болып қалған салт-дәстүрлер мен дәстүрлі Ислам дінінің өте ұқсастығы мысал келтіріліп, талқыланып жазылған. Жиында Айдар Садырбаевтың кіріспе сөзінен соң, алғашқы болып ҚМДБ Семей өңірі бойынша өкіл имамы Мақсат қажы Алтыбай сөз алып, кітапқа тереңірек түсінік беріп өтті.
— Кітаптың алғы сөзінде ҚМДБ төрағасы, Бас мүфти Ержан қажы Малғажыұлы хазіреті: «Ата-бабамыз сан ғасырдан бері аңсап өткен Тәуелсіздікке қол жеткізудің арқасында халқымыз өзінің дәстүрлі мәдениетіне, тілі мен дініне толыққанды ие болып, сол арқылы оларды заманға сай дамуға мүмкіндік алды. Мақсатымыз ұлттық табиғатымызбен сабақтас шариғатттағы масхабымызбен, танымдық мектебімізбен тұғырлап, асыл дінімізді жарыққа шығару, үзілгенімізді жалғап, жоғалтқанымызды түгендеу, сан ғасырлық тарихы бар діни дәстүрімізді қалпына келтіру, қолымыздағы кітап сондай игі бастаманың жеңісі мен жемісі» деп айтқан-ды. Бұл еңбекте дәстүр туралы түсінік, дәстүрдің діндегі орыны, қазақ халқының имани дәстүрлері, имани қарым-қатынас, тілдегі айғақтар және басқа да Ислам мен дәстүріміздің қабысатын тұстары жайлы жан-жақты мағлұматтар берілген, — дей келе, — Әрбір ұлттың өзіндік дүниетанымы бар. Түрлі халықтың тарихын зерттеген ғалымдар жер бетінде ешқандай дінсіз, наным-сенімсіз ел болмағанына анық көз жеткізуде. Адамзат түрлі ұлттар мен ұлыстардан тұрады. Әрқайсысының өзіне тән ұлттық ерекшеліктері, тілі мен дәстүрі, діни нанымдары бар. Мұндай алуан түрлілік Алла-Тағаланың хикметі, — деді М.Алтыбай.
{jcomments on}Сонымен қатар, Мақсат Қуанышбекұлы қасиетті Құран — Кәрім араб тілінде түсірілгенімен, мұсылмандардың араб болуы міндетті емес екенін, жалпы жер бетінде 2 млрд. мұсылман болса, арабтар соның аз-ғантай бөлігін ғана, яғни, 300 миллионын құрайтынын айтты. Сондай-ақ, мекендерінің орналасуына қарай дүниежүзіндегі мұсылман елдерінің тілдері мен мәдениеттері өзгеше болса, оның бәрін шариғатқа қарсы қоюға болмайтынын да атап өтті. Егер қазақтың санасына сіңген салт-дәстүрін, ұлттық өнері мен мәдениетін шариғатта жоққа шығарып жүргендер болса, олар арам пиғылды діни ағымдардың өкілдері екенін өкіл имам баса айтты.
Ал, ардагерлер кеңесінің төрағасы Амантай Доғалақов болса, кітаптың қарапайым әрі түсінікті жазылғандығын атап өтті.
— Дәстүріміз бен дінімізді сабақтастырып, адамға ой салатын кітап жеңіл жазылған екен. Өз басым осы кітапты қолға алғалы көп мағлұмат алдым. Бұл кітаптың біздердің рухани тұрғыдан дамуымызға көп септігі бар. Әсіресе, жас ұрпаққа өте пайдалы дүние. Сондай-ақ, кітаптың әрбір қазақ отбасының төрінде тұруы керек деп ойлаймын, — деп атап өтті өз сөзінде.
Нұрдәулет КӘКІШЕВ, «Семей таңы»
