8 Наурыз — халықаралық әйелдер күні мерекесі қарсаңында Семей қаласында бұрын-соңды болмаған ерекше көрме ұйымдастырылды. Ерекшелігі — бұл жолғы көрме мұражайда емес, көпшілік жиі баратын шаһардағы бірқатар сауда үйлерінде өткізілді.
Семей қалалық әкімдігінің мәдениет және тілдерді дамыту бөлімі көктемді осындай айрықша бастамамен қарсы алды. «Аса мәртебелі әйел» — «Ее величество — Женщина» атты фотокөрме қаладағы «Small» сауда үйінде ұйымдастырылды. Аталған көрмеден өңіріміздің дамуына зор үлес қосып жүрген мәдениет саласы қызметкерлерінің, аспаздар мен еріктілердің және көлік қызметінің өкілдері, сонымен қатар талантты шәкірттер тәрбиелеген ұлағатты ұстаздардың, кәсіпкерлер мен көлік саласында, ауылшаруашылық, ауыр және жеңіл өнеркәсіп саласында еңбек ететін ардақты аналардың, қыз-келіншектердің суреттерін көруге болады.
Фотокөрменің мақсаты — қаламыздың дамуына өзіндік үлесін қосып жүрген «нағыз еңбек адамдарын» қала тұрғындарына таныстыру.
Қалалық мәдениет және тілдерді дамыиу бөлімінің басшысы Назерке Аққожинаның айтуынша, бұл жоба үшін 150-ден астам нәзік жандылардың суреті арнайы дайындалған. Барлығы да семейліктер, бәрі де өңірдің дамуына айрықша үлес қосып жүрген танымал жандар.
— Бұл көрменің мақсаты — әйелдер еңбегінің қоғамымыздағы орнын әрі әйел-аналардың әрдайым сымбатты және сұлу екенін көрсету. Қай заманда да әйел адамның қоғамда, отбасында алатын орны, атқарар рөлі ұшан-теңіз болған. Ол — ақылшы, тәрбиеші, үйдің береке – ырысы ғана емес, ел мен елді елдестіруші, араздықты бітістіруші, дәнекерлеуші іскер жанның да рөлін атқарып келеді. Бүгінгі ақпараттық технологиялар заманында нәзік жандылар қоғамдық өмірге белсене араласып, әлеуметтік мәселелердің шешімін табуға атсалысуда. Осындай абзал жандарға Семей шаһары да кенде емес, — дейді іс-шара бастамашылары.
Ұйымдастырушылар атап өткендей, егер қала тұрғындары бұл көрмені жылы ықыласпен қабылдайтын болса, алдағы 7 мамырда ер адамдардың фотосуреттерінен көрме ұйымдастыру да жоспарда бар екен.
Айта кетерлігі, аталмыш фотокөрме 1 — 8 наурыз аралығында «Small», «Ақшың», «Қазына» сынды үлкен сауда үйлерінде және Семей темір жол вокзалында, «Абай» халықаралық әуежайында жұртшылық назарына ұсынылады.
Әлібек Кемелхан, «Семей таңы» {jcomments off}
