Жуырда Семейге республикалық «Парасат жолы» орталығының жетекшісі Сәдібек Түгел, ҚР Сыбайлас жемқорлыққа қарсы іс-қимыл агенттігі ШҚО бойынша департаментінің басшысы Ерлан Жалмағамбет, «Шығыс — Адалдық алаңы» жобалық кеңсесінің басшысы, облыстық мәслихат депутаты М.Бақыт, Сыбайлас жемқорлыққа қарсы іс-қимыл агенттігінің ШҚО бойынша департаментінің жанынан құрылған ақпараттық-ағартушылық штабының төрайымы Арайлым Есімбекова жұмыс сапарымен келді.
Сапар барысында қала қонақтары әкімдіктің ақпараттық орталығының жұмысымен танысты. Ақпараттық орталық «Шығыс – адалдық алаңы» жобасы аясында 2019 жылдың 26 қазанында ашылған болатын. «Бір терезе» жүйесі негізінде жұмыс істейтін кеңседе жергілікті атқарушы орган тарапынан көрсетілетін 83 мемлекеттік қызметтің барлығын алуға болады.
— Біз қасиетті Семей жеріне де келіп жеттік. Сапарымыздың мақсаты – сыбайлас жемқорлыққа қарсы жүргізіліп жатқан жұмыстармен танысу. Қалада сыбайлас жемқорлыққа қарсы көптеген жобалар жүзеге асырылуда. Соның бірі — «Шығыс — адалдық алаңы» фронт-офисі. Азаматтар өздерін толғандырған мәселелер бойынша орталыққа хабарласып, ақпарат ала алады, — дейді «Парасат жолы» республикалық орталығының жетекшісі Сәдібек Түгел.
Мемлекеттік қызметшілермен кездесу барысында Сәдібек Түгел қоғамда сыбайлас жемқорлыққа қарсы іс-қимыл, сыбайлас жемқорлыққа қарсы мәдениетті қалыптастыру, парасаттылық идеологиясын ілгерілету және парасаттылық құндылықтарды кеңінен насихаттау мақсатында ашылған «Парасат жолы» орталығының жұмысымен таныстырды.
Айта кету керек, «Парасат жолы» орталығы қаламыздағы Абай кітапханасының базасында ашылған болатын. Сондай-ақ департамент басшысы Е. Жалмағамбет қылмыстық кодекске енгізілген өзгерістерге тоқталып, жемқорлыққа қарсы жауапкершіліктің күшейтілгенін ескертті.
— Жазасын ең төменгі қауіпсіз колонияда өтеу жазасы өзінің қызметтік жағдайын пайдаланған қылмыстық топпен немесе немесе адаммен бірнеше рет пара беру және алу кезінде ұсталған адамдарға қолданылады. Бас бостандығынан айыру мерзімінің ұлғаюымен қатар, пара бергені үшін және сыбайлас жемқорлыққа араласқаны үшін айыппұл мөлшері де өсті. Мәселен, қазір 145 мың теңге көлемінде пара бергендер үшін ең төменгі айыппұл 10-нан 20 есеге дейін ұлғайтылды. Егер адам 100 мың теңге көлемінде пара берген болса, онда сот тағайындаған ең төменгі айыппұл мөлшері 2 миллион теңгені құрайды. Бұрын бұл айыппұлдың мөлшері 1 миллион теңгені құраған, — деді ШҚО бойынша сыбайлас жемқорлыққа қарсы іс-қимыл департаментінің басшысы Ерлан Жалмағамбет.
Кездесу соңында департамент басшысы мемлекеттік қызметкерлерді өз жұмысына жауапкершілікпен қарауға шақырды.
«СТ» — ақпарат{jcomments off}
