Қазақстанда Наурыз мерекесі 1988 жылдан бастап жыл сайын тойланып келеді. Ал 2010 жылы 10 мамырда, БҰҰ-ның 64-қарарына сәйкес, 21 наурыз – Халықаралық наурыз мерекесі күні болып бекітілді.
2010 жылғы Наурыз мерекесінде Қазақстан халқын құттықтаған Елбасы Нұрсұлтан Назарбаев: «Жалпы ойлап қарағанда, біздің Жаңа жылымыз осы мерекеден басталса дұрыс болар еді. Қытайлар өздерінің жаңа жылын ақпанда, корейлер де өз күнтізбелері бойынша мерекелейді. Біз Жаңа жылымызды әлі күнге дейін Петр І енгізген қаңтардың 1-інен бастап жүрміз. Биыл біз Жаңа жылымызды кең ауқымда, бүкіл халықтық деңгейде, көтеріңкі көңіл-күймен, ерекше салтанатпен жаңа мазмұнда тойлағалы отырмыз», – деген еді. Осы жылдан бастап Наурыз мерекесі елімізде үш күнге созылған ерекше мейрам ретінде атап өтілетін болды.
Наурыз мерекесі 14 наурыздан, яғни Көрісу, немесе Амал күнінен басталады. Бұл — әсіресе еліміздің батыс өңірі үшін ерекше мейрам.
Ағайын-туыс бір-бірін қыстан аман шығуымен құттықтап, «бір жасыңмен» дейді. Бұл «бір жасқа есеюіңмен» дегенді білдіреді.
Амал күні ертемен үйдің барлық есіктері ашылып, дастарқан жайылады. Бір-бірін ұзақ уақыт көрмеген ағайын-туыс хал сұрасып, амандасып-сәлемдеседі. Жастар үлкендерге көрісіп шығуға міндетті. Бұл күні ескі реніш-өкпе, араздық кешіріледі.
Көрісу күні сонымен қатар Ресейдің Астрахан, Саратов, Орынбор, Қарақалпақстанның қазақтар көп қоныстанған аумақтарында да тойланады екен. Ал парсы математигі, астроном, ақын, философ Омар Хайямның күнтізбесінде жаңа жыл наурыздың 14-інен басталатыны айтылыпты.
Қазақстан Республикасының Президенті Қасым-Жомарт Тоқаев «Тәуелсіздік бәрінен қымбат» атты мақаласында Наурыз мейрамын тойлау тұжырымдамасын жасап, көктем мерекесінің мазмұнын байытуды тапсырған болатын. Елімізде Наурыз мейрамын 14 — 23 наурыз аралығында 10 күн бойы атап өту ұсынылып отыр: 14 наурыз — Сәлемдесу күні; 15 наурыз — Табиғат күні; 16 наурыз — Бабаларды еске алу және бата күні; 17 наурыз — Тарих күні; 18 наурыз — Игі істер күні; 19 наурыз — Спорт және шеберлік күні; 20 наурыз — Даналық пен білім күні; 21 наурыз — Ұлттық тағамдар күні; 22 наурыз — Ұлыстың ұлы күні; 23 наурыз — Құрмет күні.
Қаламыздағы Достық үйінде де Көрісу күні аталып өтті.
— Қыстан амалдап аман шыққан халық көктемде бір-бірімен қуана көріседі. Бұрын 10-15 үйден құралған әр ауылдың арасы шалғай болғандықтан, қыстың көзі қырауда қатынау қиын болған. Жер жібіп, жазғытұрым басталғанда қыстай көріспеген жұрт бір-біріне қонаққа барып, амандық-саулық сұрасқан. Бұл – ағайын арасын жақындататын мәні зор мейрам. Бүгінгі күні осы мейрамды қайта жаңғырту керек,- дейді «Айша-бибі» мәдени орталығының төрайымы Айман Боқбасарова.
Қазір қаланы қойып ауылдың өзінде көрші-қолаңның, ағайын-туыстың бір-бірімен араласуы сиреді. Сондықтан «Көрісу күні» тек батыста емес, еліміздің барлық аймағында қайта жаңғырса нұр үстіне нұр болар еді.
Жадыра ТӨЛЕГЕНҚЫЗЫ, «Семей таңы»{jcomments off}
