Өкен аптада Шығыс Қазақстан облысының әкімі Даниал Ахметов жұмыс сапарымен Семей қаласына келді. Іссапар барысында аймақ басшысы арнайы жиналыс өткізіп, сол жағалаудағы айналма жол арқылы өтетін жаяу жүргіншілер көпірі құрылысының жоспарымен, сондай-ақ жағалауды бекіту жұмыстарының барысымен танысып, жылумен жабдықтау нысандарын аралап көрді, көп балалы аналармен де кездесті.
Қалалық әкімдіктің мәжіліс залында өткен жиын барысында, негізінен, Семейдегі инженерлік-коммуникациялық инфрақұрылымдарды жақсарту және шаһарға «Сергек» жүйесін енгізу мәселесі кеңінен талқыланды.
— Семей қаласын одан әрі дамыту бойынша жұмысты қарқынды түрде жүзеге асыру қажет. Бұл алдымен цифрландыру және бақылаудың заманауи әдісін енгізу шараларын қамтиды. Өткен жылы Өскемен қаласында «Сергек» жүйесі енгізілді. Бүгінгі таңда біз жақсы нәтижелерді көріп отырмыз. Биыл бақылаудың мұндай әдісі Семей қаласында да қолданылуы тиіс. Бұл үшін барлық ресурстар беріледі, — деді ШҚО әкімі Даниал Ахметов.
Сонымен қатар Семей өңірін тұрақты түрде ауыз сумен қамту және де аталмыш тарапта қайта жаңғырту жұмыстарын жүргізудің жайы да кеңінен сөз болды. Айта кетейік, биылғы жылы қалаға қарасты Шақаман және Абыралы ауылдарында сумен жабдықтау желілерінің құрылысын бастау, сондай-ақ Баженов, Таңат, Клементьевка, Жазық ауылдарында блокты-модульдік станцияларды орнату жоспарлануда. Қаладағы тоғыз су құбырын, атап айтқанда Березовский, Шаған, Восход, Бобровка, Восточный кенттерін, Зағиптар қоғамы, Красный Кордон аудандарын, Алматы, Әуежай – Аягөз көшелерін және Алғабас, Гранитное, Ақбұлақ, Половинки, Мұрат, Талица, Приречное ауылдарындағы су құбырларын салуға және жаңғырту жұмыстарын жүргізуге жобалық-сметалық құжаттар әзірленуде.
Мұнымен қоса облыс әкімі Даниал Кенжетайұлы сол жағалаудағы айналма жолдың бойынан салу жоспарланып отырған солтүстік және оңтүстік жер үсті жаяу жүргіншілер өткелінің жобасын мақұлдады.
— Жалпы айтқанда, жоба маған ұнады. Бұл мешітке өту үшін ыңғайлы болады. Жер үсті жаяу жүргіншілер өткелі үшін 150 миллион теңге бөлуді тапсырамын, – деді облыс басшысы Даниал Ахметов.
Облыс әкімі сондай-ақ Ертіс жағалауын нығайту жұмыстарын да тексеріп шықты. Жалпы, қала үшін Ертіс өзенінің Бейбітшілік аралы, Мирный, Восточный кенттеріндегі жағалауын нығайту маңызды болып табылады. Жоба шеңберінде ені 9 метр болатын жаға бойындағы жоспарланбаған еңістерге және ені 1 метр болатын жоғарғы бөлігінің жиектеріне бетон плиталарын төсеу көзделіп отыр. Беткейлерді жоспарлау кезінде қолданыстағы жағалау сызығы сақталады.
Аймақ басшысы сонымен қоса қаладағы «Теплокоммунэнерго» МКК Орталық пен 103-103А қазандықтарын аралады. Облыс әкімі осы сапары барысында «Орталық» қазандығына тағы бір қазандық салынатынын атап өтті.
— Қысқа мерзімде жобалық-сметалық құжаттаманы әзірлеп, «Орталық» қазандығы үшін құрылысты бастау керек. Орынбасарым Бақытжан Байахметовке осы мәселе бойынша екі аптада бір рет жиналыс өткізуді тапсырамын. Біз бұдан былай жылумен қамтамасыз етуде мұндай олқылықтарға жол бермейміз деген сенімдемін, – деп атап өтті Даниал Ахметов.
Жұмыс сапарының соңында аймақ басшысы Даниал Кенжетайұлы алты баланың анасы Анар Сүлейменова басқаратын «Жанұя» отбасын қолдау орталығында болды. Аталмыш орталықта көп балалы, аз қамтылған және толық емес отбасылардың табысын арттыру үшін жанұяларды өз ісін ашуға ынталандыратын шараларға тартатын болады. Сондай-ақ отбасындағы салауатты қарым-қатынастарға назар аудару және салауатты өмір салтын, дене шынықтыру мен спортпен шұғылдануды насихаттау, сол тәрізді отбасыларды шығармашылық тұрғыда дамуға ынталандыру жұмыстары да жүргізіледі.
Анар Сүлейменова орталықта 10 жұмыс орны құрылатынын, орташа жалақы 90 000 теңгені құрайтынын айтты.
Аймақ басшысы орталықтың алдағы уақыттағы қызметіне жеміс тіледі.
«СТ» — ақпарат{jcomments off}
