Елбасы — қазақ халқының маңдайына біткен асыл перзенті. Ұлтымыздың ұлттық ұстанымдарын тұла бойына сіңіріп, халқымызды әлемге танытқан кемеңгер тұлға. Сындарлы сәттерде сарабдал, салмақты саясатымен елді сүріндірмей, дамудың даңғыл жолына жетелеген Нұрсұлтан Әбішұлы Назарбаев – ХХІ ғасырдың әлем мойындаған қайраткері.
Адал еңбегімен шыңдалған, әлем таныған Елбасының жолы мені шыдамдылық пен ширақтылыққа, төзімділік пен тәуекелге талпынуға, қайсарлық пен намысшылдыққа, патриот болуға бағыттады. Тарихи куәгер ретінде қоғамда 30 жыл, Қазақстан халқы Ассамблеясында 26 жыл үздіксіз қызмет атқару менің маңдайыма бұйырғанына тәубе деймін.
Елбасы ел мен жерді сүюге, қиын сәттерде әр түрлі арандатушылықтарға мойынсұнбауға, өз позициямызды берік ұстануға үйретті.
Тарих пен өмір егіз екенін уақыт дәлелдеді. Уақыт — емші, тарих – таразы. Нұрсұлтан Әбішұлы түркі әлеміне туыс, көрші елдердегі достарға мақтаныш, көптеген мемлекеттерге үлгі болып, ел абыройын асырды. Көп ұлтты Қазақстанда тұрақтылық пен келісімді сақтап, әлем жұртына өнеге көрсетті.
Біріккен Ұлттар Ұйымының төрінде Нұрсұлтан Әбішұлы қазақ тілінде баяндама жасап, еліміздің айбыны мен парасатын танытты.
Алмағайып сәтте тарих сахнасына тәуелсіз ел ретінде шығып, туын тіккен Қазақ елінің көшін аудармай, мақсатты жеріне төрт құбыласын түгел сай етіп жеткізудің қаншалықты жауапты да салмақты іс екенін басынан кешкен адам ғана түсінер.
Тағдыр шешті кезеңде Қазақ елінің тізгінін ұстап, көшін бастауды тағдыр Елбасы Нұрсұлтан Әбішұлы Назарбаевтың маңдайына жазған екен. Қазақ елінің екі тізгін, бір шылбырын қолына алған Елбасы әуелгі сәттен бастап-ақ бабалар аманатына сай ұзақты көздеп, болашақты баянды ететін байыпты жолды таңдады. Елін де осы ұстанымға ұйытты. Ұлы мақсат жолына жұмылдырды. Тағдырын қолына сеніп тапсырған халқын қиын қыстау кезеңнен аман алып шықты. Сарабдал саясаты, салиқалы ұстанымның арқасында Қазақ елі дау-дамайдан аман, ұрыс-жанжалдан тыс дамып келеді. Елбасы жолы — Елдіктің жолы! Тәубе дейміз.
2019 жылы наурыз айында Нұр–Сұлтан қаласындағы Наурыз мейрамы мен Нұр–Сұлтан атауын қолдау жөніндегі мерекелік шараға қатыстым. Қала әкімі Бақыт Сұлтанов, Парламент депутаты Бақытбек Смағұлұлы, қала әкімінің орынбасары Нұркенов Нұрлан да осы шарада болды. Менімен ниеттес және кереғар пікірдегі адамдарға түсіндіруді міндетім деп санадым. Сондағы айтқаным: «Қасым Жомарт Тоқаев Нұрсұлтанның нұрлы жолын, Қасым ханның қасқа жолын, Мәңгілік елдің ұрпақтарына керекті тыныштық пен берекені, бейбітшілікті, жалғастыратынына кәміл сенемін».
«Біріңді, қазақ, бірің дос/Көрмесең істің бәрі бос». Ұлы Абайдың ұлағатты сөзі заманның талабы, уақыттың қалауы екенін дәлелдеп тұр. Осының барлығы Қазақстанның болашағы жастарға керек.
Елбасының айтқаны болып жатыр,
Қиындықтар кейінге қалып жатыр.
Халқымның өркениетті ел болуын
Күтеді бүгінгі ұрпақ, осы ғасыр!
Осының барлығы кезекті мақтау емес, мен мұны ұпай жинау үшін пендешілікпен айтып отырғам жоқ. Еліміздің біртуар перзенті Қазақстан халқының өзіне артқан зор сенімін үлкен абыроймен атқарып шықты. Қарағайлы шағын ауданындағы жаңа көшеге Елбасының есімін беруді дұрыс шешім деп ойлаймын. Атасына ауылдың атын, көкесіне көше атауын беріп жатқан заманда еліміз үшін орасан еңбек сіңірген Елбасындай ерен тұлғаға бір даңғылдың атын бермеу – қала берді елдігімізге де сын. Сондықтан да тұрғындар парасат пайымына салып, осы бастаманы қолдайды деп сенеміз.
Тәуелсіздігіміз, бейбіт күніміз, берекелі өміріміз ұзағынан сүйіндірсін деп тілейік.
Орал ШӘРІПБАЕВ, Халықаралық «Қазақ тілі» қоғамының вице-президенті, Қазақстан халқы Ассамблеясының мүшесі.{jcomments off}
